भांगरभूंय | प्रतिनिधी
भांगरभूंय । प्रतिनिधी
कुडचडेंः फाटल्या पांच दशकां सावन कला आनी संस्कृती मळार वावुरपी कुडचडेंचें दयानंद कला केंद्र सध्या आपलो भांगरा कीर्ती महोत्सव मनयता. केंद्रचे वाटचालीक आपलें योगदान दिवपी आश्रयदाते आनी बरें मागतल्यांचो भोवमान केंद्रा वतीन करतात. ताचोच एक वांटो म्हणून केंद्राचो अध्यक्ष एम व्ही नायक हांणी कृशी मंत्री रवी नायक आनी समाज कल्याण मंत्री सुभाष फळदेसाय हांची तांच्या घऱा वचून भेट घेवन तांकां केंद्रा वतीन मानचिन्हां आनी भेट वस्तू भेटयल्यो.
रवी नायक हाचें दयानंद कला केंद्राच्या विस्तार कामाक व्हड योगदान दिलां. केंद्राचे वांगडी सुभाष फळदेसाय हाचें गुरू आनी वर्ग इश्ट आसात. ताकां केंद्रान प्रकाशीत केल्ली पुस्तकां भेटयलीं. केंदान सादर केल्ल्या प्रस्तावांक आपले सदांच सहकार्य आसतलें अशें फळदेसाय हांणी नायक हांका सांगलें.
रवी नायक आनी फळदेसाय हांका मेळपाक गेल्ल्या दयानंद कला केंद्राच्या शिश्टमंडळान सचीव बंटी उडेलकार, भांडारी नवीन खांडेकार आशिल्ले. गोंयचे पयले मुख्यमंत्री भाऊसायब बांदोडकारा हांच्या नांवान सुरू जाल्ली दयानंद कला केंद्राक राज्य सरकाराचे राज्य युवा पुरस्कार, राज्य सांस्कृतीक संस्था पुरस्कार फावो जाल्यात. संस्थेक 50 वर्सा पुराय जाल्ल्या खातीर गोंय विधानसभेंत संस्थेचें अभिनंदन करपी थाराव पास केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
