भांगरभूंय | प्रतिनिधी
सोल, खबरां संस्था: दक्षिण कोरियाचो पाद्री जांग म्युंग- सेओक हो बायलांक बेशुद्ध करून बलात्कार करतालो. थळाव्या माध्यमां प्रमाण तो बायलांच्या घरांनी आनी इगर्जेंत हें काम करतालो. हो आरोप सिद्ध जाले उपरांत दक्षीण कोरियाच्या सर्वोच्च न्यायालयान ताका २३ वर्सां बंदखणीची ख्यास्त फर्मायली.
म्युंग- सेओक हाका बंदखणीची ख्यास्त फर्मावपाची ही दुसरी खेप. ह्यान पयलीं ताका लैंगीक अत्याचाराच्या प्रकरणांत १० वर्सां बंदखणीची ख्यास्त फर्मायल्ली. २००८ ते २०१८ मेरेन तो बंदखणींत आशिल्लो. पूण २००८ वर्सा पयलीं ताणें कितल्या बायलांचो बलात्कार केल्लो तें स्पश्ट जावंक ना.
जेलींतल्यान भायर सरल्या उपरांत म्हळ्यार २०१८ ते २०२२ ह्या काळांत ताणें आनीक ३ बायलांचो बलात्कार केलो. ही केस उजवाडाक आयले उपरांत सुनावणी जाली आनी ताका दुसरे खेपे बंदखणींत धाडलो.
जपान- हाँगकाँगांतूय बायलांचें लैंगीक शोशण
जेएमएसाच्या एका वांगड्यान थळाव्या माध्यमांक सांगलें, म्युंग- सेक १९९९ वर्सा दक्षीण कोरियांतल्यान जपान, तैवान आनी हाँगकाँगां पळून गेलो. हांगा तो आपल्या अनुयायांच्या घरांत रावतालो. ह्या जाग्यार तो धर्मीक सभा करतालो. १० बायलांक सभेक आपयतालो. भलायकी तपासणेच्या नांवान तांकां सतायतालो. तांकां बेसुद्ध करून बलात्कार करतालो. ताच्या येवपाची खबर कोणाकूच सांगची न्हय. सांगल्यार नरक फावो जातलो, अशें म्युंग-सेक त्या बायलांक सांगतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
