भांगरभूंय | प्रतिनिधी
बाल्कन द्विपकल्पांतल्या देशांचो समावेश दक्षीणपूर्व युरोपांत जाता. अल्बेनिया, बॉस्निया आनी हॅर्झेगोविना, बल्गेरिया, क्रोयेशिया, मोंटेनिग्रो, मॅसिडोनिया, सर्बिया, रोमेनिया, तुर्की ह्या वाठारांचो आसपाव दक्षीणपूर्व युरोपांत जाता. पूण हातूंतल्या जायत्या देशांचो आसपाव मध्य युरोप वा दक्षीण युरोप अशा वेगळ्या वेगळ्या भागांनी लेगीत जाला. तुर्की ह्या देशाचो चडसो भाग आशिया खंडांत येता. 1991 मेरेन क्रोयेशिया, बॉस्निया आनी हॅर्झेगोविना, सर्बिया, मोंटेनिग्रो आनी मॅसिडोनिया ह्या देशांचो आसपाव युगोस्लावियांत आशिल्लो. वंशीक तणावाक लागून युगोस्लावियाच्या विंगड विंगड प्रांतांनी झुजां जालीं आनी उपरांत ह्या प्रांतांचे वेगवेगळे देश जाले. पूण ह्या देशांचे अर्थवेवस्थेचेर झुजांचो बरोच परिणाम जालो. ह्या देशांनी शेती संबंदीत उद्देग आनी खनिज संसाधनांचे सांठे खूब आसात. क्रोयेशिया आनी सर्बिया ह्या देशां मदल्या वेपारा खातीर डॅन्यूब न्हंय म्हत्वाची थारल्या.
क्रोयेशियांतलें पर्यटन – क्रोयेशिया देशाक वर्साक सुमार 11 मिलियन पर्यटक भेट दितात. एड्रियेटीक दर्यांत ल्हान-व्हड सुमार 700 जुंव्यांचो आसपाव जाता. एड्रियेटीक दर्यादेगेक तेंकून आशिल्ल्या वाठारांनी क्रोयेशियांतलो चडसो पर्यटन उद्देग चलता. सेलींग, सर्फींग, यॉटींग, कायाकींग, राफटींग हे दर्यांतले खेळ खूब लोकप्रिय आसात. इस्त्रिया, कवार्नर, डाल्मेशिया, सिबेनीक, दुब्रोवनीक, जाग्रेब, स्लावोनिया ह्या वाठारांक पर्यटक मोट्या प्रमाणांत भेट दितात. ‘डाल्मेशियन’ ह्या सुण्याची जात क्रोयेशियांतल्या डाल्मेशिया वाठारांत जल्माक आयली अशें मानतात. सिबेनीक आनी दुब्रोवनीक हीं इतिहासीक शारां म्हणून फामाद आसात. युनॅस्कोन घोशीत केल्ल्या संवसारीक दायज सुवातींचो आसपाव ह्या शारांनी आसा.
सर्बिया – क्रोयेशियाचे दक्षिणेक सर्बिया देश आसा. ह्या देशाचो चडसो भाग शेती क्षेत्रा खातीर वापरतात. रस्बॅरी ह्या फळाचें उत्पादन सर्बियांत मोट्या प्रमाणांत जाता. रस्बॅरीची निर्यात करपांत हो देश सगळ्यांत मुखार आसा.
भास – क्रोयेशिया आनी सर्बिया ह्या देशांत क्रोयेशियन आनी सर्बियन ह्यो भाशा उलयतात. ह्या भाशांनी कांय समानता आसात पूण तांची लिपी वेगवेगळी. क्रोयेशिया हो रोमन कॅथलीक लोकांचो देश. आपली भास बरोवंक ते रोमी लिपीचो वापर करतात. सर्बियाचे लोक रोमी तशेंच रशियन सिरिलीक लिपयेचो वापर करतात.
अल्बेनिया – अल्बेनिया हो युरोपांतलो एक गरीब देश. तिराना हें ह्या देशाचें राजधानी शार. अल्बानिया देशाचे 36 रेथेंनी म्हणल्यार प्रभागांनी वांटे घाल्यात. अल्बेनियांतले चडशे लोक नास्तीक अशें मानतात. 2019 वर्सा अल्बेनियांत आयिल्ल्या भुकंपांत खूब जिवीत हानी जाल्ली आनी साधनसुविधांचें लुकसाण जाल्लें.
एपोलोनिया – अल्बेनियाच्या फियर ह्या शारा लागसार एपोलोनिया हें पुराणीक शार आसा. ग्रीक देव अपोलो हांच्या नांवान ह्या शाराक नांव दिलां. ग्रिकांनीच हें शार सोदून काडिल्लें. ऑस्ट्रियन आनी फ्रँच पुरातत्वशास्त्रज्ञांनी 1930 दशकाच्या सुमाराक जमीन खणून ह्या शाराचो सोद लागलो. ह्या शाराचो चडसो वाठार लागसारच्या दोंगरा भितर आसा. ग्रीक संस्कृतायेचें दर्शन घडोवपी पुरातत्व अवशेश ह्या शारांत मेळटात.
मॅसिडोनिया – अल्बेनियाक तेंकुनूच मॅसिडोनिया देश आसा. स्कॉपिय हें ताचें राजधानी शार. ओरीड आनी प्रॅस्पा ह्यो दोन व्हड तळयो मॅसिडोनियांत आसात. दोनूय तळयो पर्यटकां मदीं लोकप्रिय आसात. तशेंच ट्रावट, ईल सारकिलीं नुस्तीं ह्या तळयांनी मेळटात.
बाल्कन खाणां-जेवणां – युरोपी आनी पश्चिमी आशियाई खाणां-जेवणांच्या प्रभावान बाल्कन खाणां-जेवणां तयार जाल्यांत. भाजयांचें लोणचें आनी मिरसांग हे दो
नूय जिनस बाल्कन लोक खूब खातात. फॅटा चीज, ब्रॅड हाचो वापरूय मोट्या प्रमाणांत जाता. बुरॅक वा पिटा हो एक प्रकारचो
ब्रॅड क्रोयेशिया आनी हेर बाल्कन प्रां
तांनी खातात. मुसाका, बोसान्स्की लोनाक, सॉआन दोमासी हीं खाणां बाल्कन वाठारांनी मेळटात.
स्नेहा सबनीस
9923633789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
