भांगरभूंय | प्रतिनिधी
हिंदू धर्मा भितर तुळशीच्या झाडाक आगळें- वेगळें म्हत्व आसा. दरेका घराच्या आंगणांत वा दारा भायर तुळस ही आसताच. पयली चौक्यांचीं घरां आसतालीं आनी मदीं व्हडली तुळस. देवळा भायर लेगीत तुळस आसता.
तुळशीक देवाचें स्थान आसा. सत्यनारायण पुजेक जर तुळशी नात जाल्यार ती पूजा पावन जायना. विष्णूक तुळशी तितल्योच आवडीच्यो, जितल्यो गणपतीक दुर्वा. तुळस आसप म्हळ्यार पावित्र्याचें वास्तव्य. जितलें तिका धर्मीक नदरेन म्हत्व, तितलेंच वखद म्हणूनच म्हत्व. थंडी जाल्यार काडो, कसाय तुळशीचीं पानां, कणसां वापरून करतात. ताका वखदी गुण आशिल्ल्यान दुयेंस पयस करपाक आदार जाता. आयज काल तुलसी युक्त स्किन क्रीम, फेसवॉश, हँडवॉश आनी जायत्यो वस्तू मेळटात. ताचें म्हत्व खबर आशिल्ल्यान ह्यो तुलसी युक्त वस्तू लोकांनी आपणायल्या. गोयकारांक च्या सामकी घोस्ताची. ती शिजताना जर तुळशी पानां वा कणसां घालीत जाल्यार च्याक एक वेगळोच स्वाद येता. तुळशीच्या वासान घर परमळता. मनशाक मरण येतकच लेगीत तोंडान तशेंच आंगार तुळशीची माळ घालून आत्म्याक शांती प्रदान करतात.
गोंयांत परबांक खाशेलें म्हत्व. जशी चवथ तशीच दिवाळी. गोंयांत दोन दिवाळी. धाकटी आनी व्हडली. नरकासुराचे दहन केले उपरांत येता ती धाकटी दिवाळी. व्हडली दिवाळी म्हळ्यार तुळशीचें लग्न. पयलीं लग्न तुळशीचें मागीर जण एकल्याचें. ह्या दीसा घराघरांनी तुळशीक नवो रंग मारतात. सरभोंवतणी मंडप तयार करतात. रोजां आनी हेर फुलांनी तिका सजयतात. तुळशी भितर ऊस, चिंच, आंवाळे, दिणो दवरतात. अंतरपाठ धरून मंगलाष्टकां म्हणून तुळशीचें विष्णू वांगडा लग्न लायतात.
तुळशीचें लग्न जालें कांय हिंदू धर्मांत लग्नकार्याक सुरवात जाता. तुळशीचें लग्न परंपरा, रीती सांबाळून वेवस्थित पद्धतीन केल्यार निश्चित बरें फळ मेळटाच. सुख, समृद्धी आनी धनाची कृपा घराचेर उरता. मनशाचें सगलें दुख्ख, क्लेश ना जाता. सगल्यांक तुळशी लग्नाचीं परबीं.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
