भांगरभूंय | प्रतिनिधी
-उपचारा खातीर गोमॅकाँत, अादले दुस्मानकायेंतल्यान हल्लो जाल्ल्याचो दुबाव
पणजी: ताळगांवांतलो नांवाडगो गुन्यांवकार सूर्यकांत कांबळी उर्फ सूर्या हाचेर अनवळखी हल्लेखोरांनी सोमारा टोंक-करंजाळे हांगा धारदार शस्त्रांनी जीवघेणो हल्लो केलो. तातूंत तो गंभीर जखमी जाल्ल्यान ताका उपचारा खातीर गोमॅकाँत दाखल केल्या.
आदले दुस्मानकायेंतल्यान सूर्याचेर हल्लो जाल्ल्याचो अदमास पुलिसांनी उक्तायला. गुन्यांवकारींतल्यान सूर्यान जायत्या जाणां कडेन दुस्मानकाय केल्या. तातूंतल्यानूच सोमारा रातीं अनवळखी बुरखो घातिल्ल्या चार जाणांनी धारदार शस्त्रांनी हल्लो केल्ल्याचो पुलिसांक दुबाव आसा.
पुलीस निरिक्षक निखील पालेकार हांच्या मार्गदर्शना खाला उपनिरिक्षक मयूर पणशीकार ह्या प्रकरणांत फुडलो तपास करतात. प्रकरणांतल्या दुबावितांक ताब्यांत घेतले उपरांतूच सूर्याचेर नेमको हल्लो कित्याक जालो, आनी कोणे केलो ते स्पश्ट जातले, अशें पणजी पुलिसांनी मंगळारा घेतिल्ले पत्रकार परिशदेंत सांगलें.
उत्तर गोंयांतल्या नांवाडग्या गुन्यांवकारांचे वळेरेंत सूर्याचें नांव आसा. जिवेशी मारपाची धमकी दिवप मारपेट करप, शस्त्रां बाळगप, हल्लो करप ह्या सारक्यां जायत्या प्रकरणांत ताचे आड विवीध पुलीस स्टेशनांत गुन्यांव नोंद आसात. सूर्याचेर पणजी पुलीस स्टेशनांत चार, जाल्यार पेडणें, दिवचल, कळंगूट आनी साळगांव पुलीस स्टेशनांत दरेकी एक अशें वट्ट 8 गुन्यांव नोंद आसात.
कांय प्रकरणांत जाल्ली अटक
कांय वर्सां पयलीं कळंगूटे जाल्ल्या मारपेट प्रकरणांत सूर्याक अटक केल्ली. ते उपरांत 2021 त ताळगांवां पावलू क्रूझ हाचेर चाकू हल्लो केल्ल्या प्रकरणांतूय ताका अटक जाल्ली. ताळगांव सयत राज्यांतल्या विवीध वाठारांनी गुन्यांवकारी संदर्भांत घडिल्ल्या हेर कांय प्रकरणांतूय सूर्याचें नांव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
