भांगरभूंय | प्रतिनिधी
‘आव्तु द फॅ’ ह्या नाटकाचो आनी ‘सावळ’ ह्या समिक्षा पुस्तकाचो आस्पाव
पणजीः मुख्यमंत्री डॉ. प्रमोद सावंत हांचे हस्तुकीं डॉ. प्रकाश वजरीकार हांणी बरयिल्ल्या ‘आव्तु द फॅ’ ह्या गोंय इन्क्विजिशन विशया वयलें नाटकाचें तशेंच ‘सावळ’ ह्या समिक्षा पुस्तकाचे लोकार्पण केलें.
सांखळेच्या रवीन्द्र भवनांत ही कार्यावळ जाली. ह्या वेळार उलयतना मुख्यमंत्री डॉ. सावंत हांणी इन्क्विजिशन विशयाचेर नाटक बरयिल्लें खातीर डॉ. वजरीकार हांचें कवतूक केलें. ‘आव्तु द फॅ’ नाटका खातीर गोंयचे एनआरआय आयुक्त आदले खासदार नरेंद्र सावयकार हांणी प्रस्तावना बरयल्या. निलेश महाले हांणी सूचक मुखपृश्ठ तयार केलां. ‘सावळ’ हें समिक्षा साहित्य कोंकणी समिक्षा मळार म्हत्वाचें योगदान दिवपी आसा, अशें मुख्यमंत्री डॉ. सावंत हांणी सांगलें.
‘सावळ’ ह्या पुस्तका खातीर राजू नायक हांची प्रस्तावना आसा. पुस्तकांच्या लोकार्पण सुवाळ्याक सांखळी रवीन्द्र भवनाचे उपाध्यक्ष विठोबा घाडी खास निमंत्रीत म्हूण हाजीर आशिल्ले. तेचवरी ग्रामीण कला आनी संस्कृती संस्था सत्तरीचे झिलू गांवकार हाजीर राविल्ले.
म्हायती आनी प्रसिद्धी खात्याचे सहाय्यक म्हायती अधिकारी श्याम गांवकार हांणी सुत्रसंचालन केलें जाल्यार संतोष मळीक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
