भांगरभूंय | प्रतिनिधी
बार्र वा आस्थापनांचें परवाने जातले रद्द
भांगरभूंय । प्रतिनिधी
पणजी: डान्सबार्राच्या नांवा खाला जे लोक पर्यटकांक लुट्टात तांचेर आतां खर कारवाय जातली. पर्यटकांक लुटपी बार्र वा हेर आस्थापनांचे परवाने रद्द जातले. परतून तांकां परवाने मेळचे नात, अशी शिटकावणी मुख्यमंत्री डॉ. प्रमोद सावंत हांणी दिल्या. मंत्रीमंडळ बसके उपरांत उलयतना तांणी ही म्हायती दिली.
गोंय हें संवसारांतलें नामनेचें पर्यटन थळ आसा. नातलां आनी नवें वर्स मनोवपाक खूबशे देशी तशेच विदेशी पर्यटक गोंयांत येतात. बार्रांनी वा हॉटेलांनी संगिताच्या तालाचेर ते नाचतात. पार्ट्यो वा संगिताच्या तालाचेर नाचपाक हरकत ना, पूण चड तिकेट घेवप हो गुन्यांव थारता. डान्स बार्राच्या नांवा खाला पर्यटकाची लुबाडणूक जाता, अशी चर्चा आसा. कांय जाणां कडल्यान कागाळी लेगीत आयल्यात. सरकार पर्यटकां कडल्यान चड तिकेट वा लुटपाचे प्रकार सोंसचों ना, अशें मुख्यमंत्र्यांनी स्पश्ट केलां.
हेर राज्यां भशेन गोंयांत डान्स बार्र हो प्रकार ना. डान्स बार्रा खातीर वेगळो परवानो आसना. तरी लेगीत नातलां आनी नव्या वर्साक हॉटेलांतलीं रेस्टॉरंण्टां, बार्रां तशेंच दर्यादेग वाठारांनी पार्ट्यो जातात. ह्या पार्ट्यांक तिकेट हजारांनी आसता. हातूंतल्यानूच पांच नखेत्रीं हॉटेलां तशेंच बार्रांक वेवसाय जाता. कांय जाणां कडल्यान पर्यटकांची लुटमार जावपाच्यो कागाळी आयल्यात. गोंयांत बेकायदो डान्सबार्रां खूब कडेन चलतात. अजून मेरेन तरी तांचेर कारवाय जावंक ना. सरकारा कडेन कारवाय करपी यंत्रणा अस्तित्वांत ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
