भांगरभूंय | प्रतिनिधी
वाळपय: वाळपय सरकारी हॉस्पीटल आनी ठाणें डोंगुर्ली ग्रामपंचायत हांच्या जोड पालवान ठाणे हांगच्या भलायकी केंद्रांत बिरेस्तार ता. 29 डिसेंबराक विशेश भलायकी शिबिराचें आयोजन केलां. ह्या शिबिरांत विवीध तरेची तपासणी आनी फुकट वखदां दितले. हातूंत व्हडा संख्येन नागरिकांनी वांटो घेवचो असो उलो आयोजकांनी दिला.
गांवगिर्या वाठारांतले जनतेमदीं भलायके विशीं जागृताय निर्माण जावची देखून ह्या शिबिराचें आयोजन केलां. हाची तयारी नेटान सुरू आशिल्ल्यान व्हडा प्रमाणांत नागरीक हातूंत वांटो घेतले अशी अपेक्षा आयोजकांनी उक्तायली. खासा करून बायलां खातीर कॅन्सर तपासणी, दोळ्यांची तपासणी, दातांची तपासणी, बायलांची भलायकी समस्या हे विशीं विशेश तपासणी करतले अशें आयोजकांनी सांगलें. सकाळच्या 9 वरांचेर ह्या तपासणेक सुरवात जातली. सांजच्या 5 वरां मेरेन दुयेतींक तपासतले. ताका लागून नागरिकांनी हाचो लाव घेवचो असो उलो आयोजकांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
