भांगरभूंय | प्रतिनिधी
खबरां संस्था
नवी दिल्लीः भारताचे आघाडेचे टेनीस खेळगडे सुमीत नागल आनी सुमीतकुमार मुकूंद हाणी फुडल्या वर्सा फेब्रुवारीत जावपी डेव्हीस करंड लडती खातीर पाकिस्तानांत वचपाक न्हयकार दिला. तांच्या ह्या निर्णयाक लागून भारता सामकार संघ वेचून काडपा खातीर समस्या उप्रासल्या. खेळगड्यांचे हे भूमिके विशीं भारतीय टॅनीस संघटनेन नाराजी उक्तायल्या. प्रशासकीय समितीचे बसकेंत हाचेर चर्चा करपाचें तांणी थारायलां.
रोहन बोपण्णाच्या डेव्हीस करंच निवृत्ती उपरांत भारतीय पंगड हे सर्तीत पयलेच फावट एक मॅच खेळटलो. विशेंय म्हणल्यार ही संवसारीक गट- 1तली लडत आसा. ताका लागून तिका म्हत्व आसा. नागल व्हो दादल्यांचे एकोडीत भारताचो सगल्यांत बरो टॅनीस खे ळगडो आसा आनी तो एटीपी क्रमवारींत 141वे सुवातेर आसा. मुकूंद 477वे सुवातेर आसून तो क्रमवारी प्रमाण भारताचो दुसरो सगल्यांत बरो टॅनीस खेळगडो आसा.
नागल आनी मुकूंदान हे लडती खातीर आमी उपलब्द आसचे नात अशें एआयटीएक कळयलां. मात तांणी ह्या निर्णया फाटलें कारण स्पश्ट केलें ना. पाकिस्ताना ही लडत ग्रास कोर्टाचेर खेळोवपाचो निर्णय घेतला. ताका लागून खेळपाक आनी तयार नात अशें सुमितान पंगड वेवस्थापनाक कळयलां जाल्यार मुकूंदान वैयक्तीक कारणाक लागून खेळप शक्य ना अशे सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
