भांगरभूंय | प्रतिनिधी
गोंय आनी येजमान झारखंड ह्या पंगडां मदीं झारखंडाच्या किनन स्टेडियमाचेर कालच्यान रणजी मॅच सुरू जाली. येजमान पंगडान पयल्या दिसाचो खेळ सोंप मेरेन 4 विकेटी वगडावन 280 धांवड्यो केल्यात. गोंया वतीन मोहित रेडकार आनी दर्शन मिशाळ हांणी दरेकी दोन विकेटी घेतल्यो.
पयल्या दिसाचो खेळ सोंपलो त्या वेळार सौरव तिवारी आनी कुमार कुशाग्र अर्द शेंकडे मारून खेळपट्टीचेर आसात.
झारखंडान टॉस जिखून पयली बॅटीगं करपाचो निर्णय घेतलो. ताचो हो निर्णय कांय प्रमाणांत योग्य लेगीत थारलो. ओपनराची जोडी कुमार देवव्रत आनी उत्कर्ष सिंग हांणी डावाची सुरवात करतना पयले विकेटी खातीर 61 धांवड्यांची भागिदारी केली. अखेरेक दर्शन मिशाळान कुमार देवव्रताक वैयक्तीक 30 धांवड्यांचेर बाद केलो. उत्कर्षाक साथ दिवपाक कुमार सुरज मैदानांत देवलो. पूण, ही जोडी चड वगत खेळपट्टीचेर तग धरपाक शकली ना. उत्कर्ष 33 धांवड्यांचेर मोहित रेडकाराच्या बॉलाचेर दीपराज गांवकारान उत्कृश्ट रितीन कॅच धरली. उत्कर्ष बाद जालो त्या वेळार झारखंडाची धांवसंख्या 73 आशिल्ली. ते उपरांत दर्शन मिशाळान विराट सिंगाक (32) बाद केलो. ते उपरांत वैयक्तीक 48 धांवड्यांचेर कुमार सुरज हो मोहित रेडकाराच्या बॉलाचेर एलबीडब्लू बाद जालो.
ते उपरांत सौरव तिवारी आनी कुमार कुशाग्र हांणी संयमान बॅटींग करून पंगडाचो स्कोर मुखार व्हेलो.
थोडे भितर धांवतकटोः झारखंड (पयलो डाव) 90 ओव्हरींनी 4 बाद 280 धांवड्यो (कुमार देवव्रत 30, उत्कर्ष सिंग 33, कुमार सुरज 48, विराज सिंग 32, सौरव तिवारी खेळटा 65, कुमार कुशाग्र खेळटा 60, मोहित रेडकार 2-92, दर्शन मिशाळ 2-59).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
