ज्युनियर मेहमूद संवसाराक अंतरले
भांगरभूंय | प्रतिनिधी
पणजी ः अभिनेते ज्युनियर महमूद (67) काल रातीं संवसाराक अंतरले. तांकां पोटाचो कॅन्सर जाल्लो. फाटले दोन म्हयने ते दुयेंत आशिल्ले. तांचें वजन उणें जावपाक लागलें हें कळटकच तांची वैजकी चांचणी केली. त्या वेळार तांका कॅन्सर जाल्ल्याचें स्पश्ट जालें. तांका फुफ्फुसाचो आनी यकृताचो कॅन्सर जाल्लो. तशेंच हालींच तांच्या आंतकड्यांनी ट्यूमर जाल्ल्याचें दिसून आयलें. ते स्टेज फोर कॅन्सरा कडेन झुजताले. ते 40 दिसां परस चड काळ जियेवंक शकचे नात, अशें दोतोरांनी स्पश्ट केलें. निमाणें काल रातीं तांकां मरण आयलें. तांचे फाटल्यान घरकान्न, दोन चले, सुनो आनी नातू असो परिवार आसा.
नईम सय्यद हे ‘ज्युनियर मेहमूद’ ह्या नांवान 1960, 1970 च्या दशकांत फामाद आशिल्ले. तांकां ‘जूनियर मेहमूद’ हें नांव नामनेचे अभिनेते मेहमूद अली हांणी दिल्लें. ते मेहमूदाची हुबेहुब नक्कल करताले. मेहमुद हांणी ८ वर्सांच्या नईम हांच्या बापायक आपोवन हांव हाका अभिनय शिकयतां, अशें सांगलें. उपरांत ज्यु. मेहमूद मेहमूदाचे शिश्य जाले.
ज्यु. मेहमूद हांणी 7 भाशांनी 265 चित्रपटांनी काम केलां. तशेंच 6 मराठी चित्रपटांची निर्मिती आनी दिग्दर्शनय केलां. ‘नैनिहाल’ हो तांचो पयलो हिंदी सिनेमा. परिवार, ब्रह्मचारी, फरिश्ता, प्यार ही प्यार, कटी पतंग, आन मिलो सजना, कर्ज चुकाना है.. आनी हेर जायत्या सिनेमांनी तांणी अभिनय केला.
ज्युनियर मेहमूद आनी सचिन पिळगांवकार हे इश्ट. तांणी बाल कलाकार म्हणून आपली करिअरची सुरू केली. ‘बचपन’, ‘गीत गाता चल’ आनी ‘ब्रह्मचारी’ ह्या सारक्या चित्रपटांनी हे जोडयेन एकठांय काम केलें. ज्युनियर महमूद हांणी जितेंद्रा वांगडा ‘सुहाग रात’, ‘कारवाँ’, ‘सदा सुहागन’ ह्या सारक्या चित्रपटांनी काम केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
