जोशीभाट, सुर्ला नव्या वर्साक येवकार 

भांगरभूंय | प्रतिनिधी

विवीध कार्यावळींचें आयोजन; ‘कविता एक सांज’ कार्यावळ रंगली

दिवचल: सांखळे मतदारसंघांतल्या सुर्ला जोशीभाट हांगच्या सातोडकार कुटुंबीयानी नव्या वर्साक येवकार दिवपाच्या निमतान अंदूंय 15 वी खासा सांस्कृतीक कार्यावळ आयोजीत केल्ली.

ह्या निमतान सुरेश महादेव बायेंकार हांची ‘कविता एक सांज’ ही समाजीक विशयाचेर कवितांचे सादरीकरण कार्यावळ जाली. हाका बरो प्रतिसाद मेळ्ळो. मनोहरया हांच्या कवितांची रसिकांनी तोखणाय केली. 

ह्या वेळार भिले सुर्ला हांगच्या सरकारी माध्यमीक विद्यालयांत 2021-22ह्या शिक्षणीक वर्सा धावेचे परिक्षेंत पयली आयिल्ली विध्यार्थीनी ग्रंथाली उदय शिरोडकार हिचो सोयर्‍यां हस्तुकीं भोवमान केलो. उत्कृश्ठ नृत्यांगना ब्रिजाली देर्गुणकार, उत्कृश्ठ बाल गायिका मृणाली सुर्लकार हांचोय भोवमान जालो. 

हे कार्यावळींत जिल्हो पंचायत वांगडी गोपाळ सुर्लकार, सरपंच विश्रांती सुर्लकार, पत्रकार सुरेश बायेंकार, रवींद्र भवन सांखळीचे वांगडी मनोहर वळवयकार, ज्येश्ठ नागरिक जानू सातोडकार, सिद्धेश सातोडकार, उदय शिरोडकार, उत्कर्षा शिरोडकार हाजीर आशिल्लीं. 

गोपाळ सुर्लकार, विश्रांती सुर्लकार, सुरेश बायेंकार हांणी नव्या वर्साच्या येवकार दितना आपले विचार मांडले. 

सातोडकार परिवार वांगडी, श्री शिव चीदंबर कल्चरल असोसिएशन डिंगणे हांणी विवीध संस्कृतीक कार्यावळी सादर केल्यो. 

ही कार्यावळी जोशीभाट देवस्थानाच्या आंगणांत आयोजीत केल्ली. हाका बरो प्रतिसाद मेळ्ळो. सुत्रसंचालन उदय सातोडकार हांणी केलें. जाल्यार सिद्धेश सातोडकार हांणी उपकार मानले.