भांगरभूंय | प्रतिनिधी
बायलांचे संवसारीक टी-20 क्रिकेट सर्तींत आयज अ गटांत भारत आपली पयली मॅच न्युझिलॅण्डा आड खेळटलो. अजून मेरेन संवसारीक टी-20 सर्त जिखपाक अपेशी थारिल्ल्या भारत आपलें फाटलें अपेस विसरून नव्यान सुरवात करपाक इत्सूक आसतलो.
घडये आपली निमाणी मॅच खेळपी मुखेली हरमनप्रीत कौर साबार खेपे करंडान हुलकावणी दिल्या. ताच्याच फुडारपणाखाला भारतान 2020चे फायनलींत पाविल्लो. पूण, बळिश्ट ऑस्ट्रेलिये कडल्यान ताका हार घेवची पडिल्ल्यान उप वस्तादपणाचेर समाधान मानचें पडिल्लें.भारता कडेन प्रतिभावंत खेळगडयो आसात.पूण, म्हत्वाच्या मॅचींनी तांकां अपेक्षे प्रमाण खेळपाक अपेस येता.
न्युझिलॅण्ड लेगीत आपल्या वस्तादपणाची वाट पळयता. तो दोन खेपे फायनलींत पाविल्लो. पूण, दोनूय खेपे दुसरे सुवातेर समाधान मानचें पडलां. भारतान जैतान सुरवात करपाक इत्सूक आसतलो. कारण अ गटांत ऑस्ट्रेलिया, श्रीलंका आनी पाकिस्तान हे बळिश्ट पंगड आसात. ताका लागून एक हार लेगीत भारताचें फुडले फेरयेंत पावपाचें गणीत इबाडपाक शकता.
हरमनप्रीत, स्मृती मंधाना, जेमिमा रॉड्रिग्स, शेफाली वर्मा आनी दिप्ती शर्मा हांच्या कडल्यान भारताक बऱ्या प्रदर्शनाची आस्त आसतली. शेफाली आनी मंधाना फॉर्मांत आसात. मंधानान फाटल्या पांच टी-20 डावांनी खेळटना तीन अर्द शेंकडे मारल्यात. पूण, हरमनप्रीताचो फॉर्म भारता खातीर हुस्क्याची गजाल आसा. ती फॉर्मांत आसप भारताच्या वयले आनी मधले फळये खातीर म्हत्वाचें आसा.
यूएईंत सध्या खूब गर्मी आसा, ताका लागून धांवड्यांचो पावस पडपाची शक्यताय उणीच आसा. खासा करून सर्तीचे अखेरेक. खेळपट्यांक वेरो गेल्यार हाचो फायदो भारताच्या स्पिनरांक मेळुये. पंगडांत रेणुका सिंग, पुजा वस्त्रकर आनी अरुंधती रेड्डी ह्यो तीन फास्ट बॉलर आसात. भारत फकत दोनूच फास्ट बॉलरांक खेळोवपाक शकता. भारताच्या स्पीन विभागांत विवीधताय आसा. ऑफ स्पिनर दिप्ती आनी श्रेयंका पाटील, लेग स्पिनर आशा शोभना आनी दावखुकरो स्पिनर राधा यादव हांचेर आक्रमणाची जापसालदारकी आसतली.
न्युझिलॅण्डाच्या पंगडांत अणभवी आनी युवा खेळगड्यांचे बरें मिश्रण आसा. ताका लागून भारतान प्रतिस्पर्धी पंगडाक उणे लेखपाची चूक करची न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
