भांगरभूंय | प्रतिनिधी
फाटल्या 6 दशकांतली स्थिती; ‘एन्व्हायर्नमेंटल रिसर्च’चो अहवाल
खबरां संस्था
नागपूर : भारतांत रानांक लागपी उजो आनी विकास, रानक्षेत्र उणें जावपाक कारण थारता. जागतीक पांवड्यार लेगीत रानक्षेत्रांत उणाव जाल्ल्याची म्हायती मुखार आयल्या. फाटल्या 6 दशकांत जागतीक रानक्षेत्र 81.7 दशलक्ष हॅक्टरांनी उणें जालां. ‘जर्नल एन्व्हायर्नमेंटल रिसर्च’ अहवालांत हे विशीं म्हायती दिल्या.
पर्यावरणांतलो बदल आनी जैवविविधता लुकसाणी हे सारक्या आव्हानांक तोंड दिवपाक रानपरिसंस्थांची भुमिका म्हत्वाची आसता. ताका लागून जागतीक पांवड्यार रानक्षेत्र उणें जावप ही व्हड गंभीर आनी हुस्क्याची गजाल आसा. फाटल्या 6 दशकांत 60 टक्क्यांनी रानक्षेत्र उणें जालां. ताका लागून जैवविविधता धोक्यांत आयल्या.
1960 ते 2019 ह्या काळांत 81.7 दशलक्ष हेक्टर रानक्षेत्र उणें जालां. ताचो रानपरिसंस्थेच्या अखंडतेचेर परिणाम जाता. तांची निर्मणी आनी गरजेच्यो सेवा दिवपी तशेंच जैवविविधता तिगोवन दवरपाची तांक उणी जाता, अशें अहवालांत नमूद केलां.
विवीध कारणां खातीर रानांचेर निंबून आसपी विकसनशील देशांतल्या उण्यांत 1.6 अब्ज
लोकांचे जिणेचेरूय ताचो परिणाम जाता.
रानांचें निरिक्षण आनी खोलायेन अभ्यास जावप गरजेचें
रानांचें निरिक्षण हो विवीध जागतीक पर्यावरणी आनी सामाजीक उपक्रमांचो अविभाज्य भाग. जातूंत शाश्वत विकास उद्दिश्टां अानी 2020 उपरांतच्या जागतीक जैवविविधता रचणुकेचो आस्पाव आसा. ह्या उपक्रमांची उद्दिश्टां साध्य करपाक मजत करपाची आसल्यार संवसारांतल्या उरिल्ल्या रानांचें संरक्षण जावप गरजेचें, अशेंय अहवालांत नमूद केलां. उण्या विकसीत देशांतल्या रानांच्या हानीचो उपगिऱ्याच्या माध्यमांतल्यान घेतिल्लो हो नियाळ आसा. रानांक लागपी उज्या विशीं विकसीत देशांच्या भुमिकेचोय अदीक खोलायेन अभ्यास करप गरजेचें, अशें ह्या अभ्यासाचे मुखेल लेखक रोनाल्ड सी. इस्टोक हांणी अहवालांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
