भांगरभूंय | प्रतिनिधी
ऍल्पायन देशांचो भाग आशिल्लो जर्मनी हो देश संवसारांतलो सगळ्यांत गिरेस्त देश. तशेंच युरोपांतली एक आघाडीची उद्देगीक शक्त म्हणून जर्मनी राष्ट्र मुखार आयला. जर्मनीच्या भोंवतणी पोलंड, चेक रिपब्लीक, ऑस्ट्रिया, स्वित्झरलॅण्ड, फ्रांस, लकस्मबर्ग, बेल्जियम आनी नेदरलण्ड हे वेगवेगळे देश आसात. जर्मनीची राष्ट्रभास जर्मन. जर्मनीचें राष्ट्रीय चलन युरो.
झूज – 1933 ते 1945 ह्या काळांत ऍडॉल्फ हिटलर आनी नाझी पार्टीन जर्मनीचेर हुकूमशा राज्य केलें. त्या काळांत, ह्या देशाक नाझी जर्मनी अशें म्हणटाले. वंशीक कत्तल, सामुहीक हत्या नाझी सत्ते वेळार जाली. 1941 ते 1945 ह्या काळांत, असंख्य ज्यू वा यहुदी लोकांची हत्या जर्मन नाझी सत्तेन केली. मरणाच्या ह्या अच्छेवाक ‘holocaust’ अशें इंग्लीशींत म्हणटात. जागतीक झूज II उपरांत, जर्मनीचे दोन भाग जाले. पश्चिमेंतल्या भागाचेर अमेरिकेचें नियंत्रण आनी पुर्वे कडल्या भागाचेर रशियेचें नियंत्रण आशिल्ले. 1961 वर्सा, पुर्वे कडल्या जर्मनांनी देश सोडून वच्चे न्ही म्हणून 155 किलो मिटर लांबायेची बर्लीन वणत (बर्लीन वॉल) बांदिल्ली. 1990 वर्सा जर्मनीचें एकीकरण जालें तेन्ना ही वणत अधिकृत रित्या मोडिल्ली.
शारां – जर्मनीचें राजधानी शार आनी जर्मनीचें सगळ्यांत व्हडलें शार म्हणल्यार बर्लीन. फ्रँकफर्ट ही जर्मनीची अर्थीक राजधानी. देशांतलो सगळ्यांत व्यस्त विमानतळ फ्रँकफर्टांत आसा. हॅमबग, म्युनीक, फ्रँकफर्ट हीं ह्या देशांतलीं हेर कांय म्हत्वाचीं शारां.
खनीज – जर्मनींत कोळशाचे खूब सांठे आसात. रूर न्हंयेच्या वाठारांत उच्च दर्ज्याचे कोळशाचे सांठे मेळटात. हाचे भायर लोखंड, तांबे, पोटॅश, निकेल हे खनीज मेळटात.
शेती – जर्मनींतली सुमार 50 टक्के जमीन शेती खातीर वापरतात. गंव, बीट, बटाट ह्या पिकांची लागवड जर्मनींतल्या उत्तर भागांत जाता. आधुनीक यंत्रां आनी रसायनीक सार्याचो वापर करून शेत रोयतात. रायन आनी एल्ब ह्या न्हंयांच्या वाठारांत मोट्या प्रमाणांत शेती वेवसाय चलता.
उद्देग – अभियांत्रिकी तशेंच उच्च दर्ज्याचें तंत्रगिन्यान तयार करपी उद्देग जर्मनींत आसात. जर्मनीन 15व्या शेंकड्यांत छापणावळाचो सोद लायलो. संवसारांत गाडयांची निर्मिती करपी देशां मदीं जर्मनी चवथ्या क्रमांकाचेर लागता. बीएमडब्ल्यू, आवदी, मर्सडीज बॅन्झ ह्यो सगळ्यो जर्मनींतल्यो गाडयो तयार करपी कंपन्यो. संवसारांतले चडशे देश ह्यो गाडयो वापरतात. लुफ्तान्सा ही जर्मनींतली विमान कंपनी आंतरराष्ट्रीय विमानसेवा दिवपी मुखेल कंपनी आसा. आल्बर्ट आयन्स्टायन तशेंच नोबेल पुरस्कार जैतीवंत पिटर
ग्रुनबर्ग अशा जायत्या संशोधकांनी जर्मनींतल्या भौतीकशास्त्रांत म्हत्वाचें योगदान दिलां.
पर्यटन – राजा-महाराजांनी बांदिल्ले राजवाडे तशेंच केथेड्रल, इतिहासीक वस्तूसंग्रहालयां, तळें, राष्ट्रीय उद्यान, शारी जीण ह्या गजालींचो अणभव घेवंक पर्यटक जर्मनीक भेट दितात. फ्रँकफर्टांतलें कलोन केथेड्रल, बवॅरियांतलो नोयश्वानस्टायन कॅसल, बॉल्टीक सीट आयलण्ड हीं पर्यटन थळां चड लोकप्रिय आसात. म्युनीकच्या ऑक्टोबर फॅस्ताचोय अणभव घेवंक पर्यटक जर्मनीक भेट दितात.
खाणां-जेवणां – जर्मनीच्या खाणां-जेवणांनी बटाट तशेंच दुकराचें मांस मोट्या प्रमाणांत वापरतात. पोर्क वा बीफ पसून तयार केल्लो ‘ब्राटवस्ट’ हो पदार्थ जर्मनींत चड लोकप्रिय. ‘श्निटझल’ हो पदार्थ कटलेटा वरवीं दिसता. पोर्का पसून तयार केल्लो हो पदार्थ. तशेंच तळिल्ल्या बटाटाचे वेगवेगळे पदार्थ जर्मनींत मेळटात.
स्नेहा सबनीस
9923633789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.