भांगरभूंय | प्रतिनिधी
नवी दिल्ली, खबरां संस्था ः कलम 370 रद्द जाले उपरांत विरोधकांनी केंद्र सरकाराचेर जम्मू-काश्मीराचे परिस्थिती विशीं सतत प्रस्न उपस्थीत केल्यात. ते उपरांत जाल्ल्या सगळ्या संसदीय अधिवेशनांत विरोधकांनी हे बाबतींत सरकाराक कोंयडेंत आडकावपाचो यत्न केला. मोदी सरकारान जम्मू- काश्मीरांतली परिस्थिती परत आशिल्ली तशी करूंक नाशिल्ल्याचोय आरोप आसा. हे फाटभुंयेर केंद्र सरकारान व्हडलो निर्णय घेवन जम्मू- काश्मीरांत तहरीक-ए-हुर्रियताचेर बंदी घाल्या. केंद्रीय गृहमंत्री अमित शाहान आपल्या एक्स (ट्विटर) खात्याचेर हे संबंदी म्हायती दिल्या.
आतंकवादी कारवायेंचो आरोप
युएपीए कायद्या खाला तहरीक- ए- हुर्रियात पांच वर्सां खातीर बंदी घाल्या. फुटीरतावादी शक्तींक सशक्त करप, राश्ट्र विरोधी वावरांत वांटो घेवप, आतंकवादाक सारें- उदक घालप असो आरोप हे संघटनेचेर केला. हे संबंदी अमित शाहान केल्ल्या सोशल मिडिया पोस्टांत सविस्तर म्हायती दिल्या.
अमित शाहान कितें म्हणलें?
अमित शाहान केल्ल्या पोस्टांत तहरीक- ए- हुर्रियताचेर केल्ले कारवाये संबंदी भुमिका स्पश्ट केल्या. “तहरीक- ए- हुर्रियत ही संघटना युएपीए कायद्या खाला बेकायदेशीर जाहीर केल्या. जम्मू- काश्मीर भारता पसून वेगळो करप आनी थंय इस्लामी कायदो चालीक लावपाच्या वावरांत ही संघटना वावुरता. जम्मू- काश्मीरांत फुटीरता वाद पातळावपा खातीर ही संघटना आतंकवादी कार्यावळी आनी राश्ट्रविरोधी वावर करपाक वावुरता असो उल्लेख अमित शाहान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
