भांगरभूंय | प्रतिनिधी
पुराभिलेख खात्याचे दोन कर्मचारी आनी वेवसायिकाचो आस्पाव
भांगरभूंय I प्रतिनिधी
म्हापशेंः बनावट दस्तावेज तयार करून कळंगूटेंतली मालमत्ता बेकायदो पद्दतीन हडप केल्ले प्रकरणांत विशेश तपास पंगडान (एसआयटी) धिरेश गंगाराम नायक (45, बांदोडें-फोंडें), महेश माड्डो नायक (34,मडकय- फोंडें) ह्या पुराभिलेख खात्याच्या कर्मचाऱ्यां सयत वेवसायीक अनील आनंद नायक (38, उंडीर-बांदोडें) ह्या तिगांक अटक केल्या.
कळंगूटेंतली सर्व्हे क्रमांक 26/9 आनी सर्व्हे क्र. 476/2 तल्या जमनीचे बनावट मालकीपत्र आनी हेर दस्तावेज तयार करून जमीन हडप केल्ल्याच्या गुन्यांवा खाला एसआयटीन वयल्या तिगां दुबावितांक अटक केल्या.
फिर्यादी हिलोरियो फर्नांडीस आनी जॅनेट फर्नांडीस हांच्या पूर्वजांच्या कळंगूटेंतल्या जमनीच्या म्युटेशना विशीं दिसाळ्यांत जायरात प्रसिद्ध जाल्ली. हे जायरातींत संबंदींत जमनी विशीं कोणाचो आक्षेप आसल्यार बार्देस मामलेदार कार्यालयांत संपर्क करपाची सुचोवणी केल्ली.
ते प्रमाण कागाळदारांनी मामलेदार कार्यालयांत वचून चवकशी केल्यार जमनीच्या म्युटेशन संदर्भांतलीं प्रक्रिया पुराय जाल्ल्याची म्हायती तांकां मेळ्ळी. ते उपरांत फिर्यादींनी म्हापशें पुलीस स्टेशनांत ह्या प्रकरणांत कागाळ दाखल केल्ली. ते उपरांत हे प्रकरण एसआयटी कडेन सोंपयिल्ले.
ह्या जमीन हडप प्रकरणांतलो मुख्य सुत्रधार सेड्रीक फर्नांडीस, अँटोनेटे ऊर्फ अँटोनिटा फर्नांडीस, मारिया अँजेलो ऊर्फ अँजेलिका फर्नांडीस, रायाजी पाटील, सुनील गोयल, बार्देसचे मामलेदार हांच्या विरोधांत बनावट दस्तावेज तयार करप, मूळ कागदपत्रांत बेकायदो फेरफार करप आनी फटवणुकेच्या आरोपा खाला गुन्यांव दाखल केल्लो.
बुधवारा एसआयटीन पयलीं धिरेश नायक हाका चवकशे खातीर अापयले, उपरांत ताका अटक केली. ते उपरांत महेश नायक आनी अनील नायक हांकांय अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
