भांगरभूंय | प्रतिनिधी
27 लाखांक तोपी घातिल्ल्यान एसआयटीन केल्ली अटक
भांगरभूंय । प्रतिनिधी
पणजीः सांगोल्ड्यां प्लॉट दिवपाचें हांयस दाखोवन पर्वरे रावपी एका जोडप्याक 27 लाखांक तोपी घाल्ल्या प्रकरणांत विशेश तपास पंगडान (एसआयटी) पर्वरेच्या संदीप अर्जुन वझरकाराक अटक केल्ली. अटक केल्ल्या दुबाविताक म्हापशेंच्या जलदगती न्यायालयान 50 हजार रुपयांची वैयक्तीक हमी आनी 25 हजार रुपयांचें दोन हमिदार तशेंच हेर अटींचेर जामीन मंजूर केला.
ह्या प्रकरणांत पर्वरे रावपी पुरुषोत्तम कुमार अग्रवाल हांणी वयल्या प्रकरणांत कागाळ दाखल केले उपरांत म्हापशें पुलिसांनी सुकूर वाठारांत आशिल्ले ‘हर्षसमर्थ डेव्हलोपर्स’ कंपनीचो धनी संदीप अर्जुन वझरकार (रा. बस्तोडें, मूळ सुकूर) आनी अविनाश सूर्या नायक (रा. बार्रोसवाडो, सांगोल्डें) हांचे आड गुन्यांव नोंद केल्लो. जमीन वेव्हार प्रकरणांत एसआयटी स्थापन जाले उपरांत हें प्रकरण तांकां वर्ग केलां.
कागाळे प्रमाण फटवणुकेचो हो प्रकार नोव्हेंबर 2018 ते ऑगस्ट 2021 ह्या काळांत घडलो. सांगोल्ड्यां सर्वे नं. 21/ 31 तलो प्लॉट दिवपाची हमी दुबावितांनी कागाळदार अग्रवाल हांकां दिल्ली. दुबावितांनी तशी तोंडी कबलात केल्ली. फक्त कागदपत्रां वरवीं तांकां जमीन विकत दिवपाचें आस्वासन दिल्लें. ताचे बदला अग्रवाल जोडप्या कडल्यान वयल्या काळांत 27 लाख रुपया दुबावितांनी घेतिल्ले. ते उपरांत प्लॉट दिवपाक दुबावीत टाळाटाळ करपाक लागले. ताका लागून अग्रवाल जोडप्यान तांकां दिल्ले पयशे परतून मागिल्ले.
हे कागाळेची दखल घेवन म्हापशें पुलिसांनी दुबाविता आड गुन्यांव दाखल केल्लो. हें प्रकरण एसआयटी कडेन वर्ग केले उपरांत बिरेस्तारा 8 सप्टेंबराक रातच्या वेळार दुबावीत संदीप वझरकाराक अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
