भांगरभूंय | प्रतिनिधी
मुख्यमंत्रीः मयां तीन खाजन बांदांचे दुरुस्तीक सुरवात
भांगरभूंय । प्रतिनिधी
दिवचलः सरकारान विवीध कायद्यांनी बदल करून मयें स्थलांतरीत मालमत्ता प्रस्न सरकारान सुटावो केला. तेच धरतेचेर शेत जमनींचे सगळे दावे निकालांत काडून सगळ्या येवजण्यांचो लाव दितात. मयेंच्या शेतकारांनी जमनीचो एक कुडको लेगीत पडीक दवरच न्हय. आंतरपिकां, समूह शेती, दूद उत्पादन हे बाबतींत सरकारी येवजण्यांचो लाव घेवन तरणाट्यांनी शेतां पिकोवपाक फुडें सरचें. स्वयंपूर्ण आनी आत्मनिर्भरतेच्या मंत्राचो जप करचो. सरकार सगळे तरेची मजत करतलो, अशें उतर मुख्यमंत्री डॉ. प्रमोद सावंत हांणी दिलें.
मयें, नार्वें, चोडणाच्या मुलाख खाजन, डिंगी खाजन आनी म्हाखाजन ह्या तीन बांदांचें नुतनीकरण आनी दुरुस्ती कामाक मुख्यमंत्री डॉ. सावंत हांचे हस्तुकीं सुरवात जाली. ह्या वेळार ते उलयताले.
कृशी खात्या वतीन मयें पंचायत सभाघरांत आयोजीत केल्ले कार्यावळींत मुख्यमंत्र्यान नांव तकट्याचें अनावरण केलें. ह्या वेळार मयेंचे आमदार प्रेमेंद्र शेट, सरपंच दिलीप शेट, संदेश पार्सेकार, मोहिनी जल्मी, पंढरी वेर्णेंकार, कृशी अधिकारी नेव्हल आफोंसो, शंकर चोडणकार, महेश सावंत हाजीर आशिल्ले.
सुमार 10 कोटी रुपया खर्च करून 350 परस अदीक शेतकारां खातीर सरकारान हो उपक्रम हातांत घेतला. सगळ्यांनी 100 टक्के उत्पन्न घेवन शेती वेवसायाक चालना दिवची. किसान क्रेडीट कार्डां, सॉयल हेल्थ कार्डां 100 टक्के उपलब्ध करून दिवप तशेंच प्राकृतीक शेती, सेंद्रीय शेती खातीर सरकारान विवीध उपक्रम हातांत घेतल्यात, अशें मुख्यमंत्री डॉ. सावंत हांणी सांगलें.
सरपंच, पंच वांगड्यांनी फकत कदेलांचेर बसून रावचें न्हय जाल्यार गांवांतल्या दरेका घरांनी सरकारी येवजण्यो पावच्यो हे खातीर कश्ट घेवचे. कृशी अधिकाऱ्यांनी तत्परता दाखोवन विशेश शिबिरां आयोजीत करून शेतकारांक सगळे तरेची मजत करची, अशी सुचोवणी मुख्यमंत्री डॉ. सावंत हांणी ह्या वेळार केली. कोटींचो खर्च करून सरकार सगळे तरेची सुविधा दिता, मात शेतकार अजून लेगीत मुखार सरनात, अशीय खंय तांणी ह्या वेळार उक्तायली.
आमदार शेट हांणी सांगलें, सरकाराचे नवे येवजणेक लागून मयां वाठारांत कृशी क्रांतीक चालना मेळटली. धवल आनी हरीत क्रांती खातीर तरणाट्यांनी फुडाकार घेवन आत्मनिर्भर आनी स्वयंपूर्ण गोंय हें मुख्यमंत्र्यांचें सपन प्रत्यक्षांत हाडचें.
नेव्हील आफोंसो हांणी प्रकल्पाची म्हायती दिली.
ह्या वेळार 9 प्रगतशील शेतकारांचो मुख्यमंत्री डॉ. सावंत हांचे हस्तुकीं सत्कार केलो. विश्वास चोडणकार हांणी सुत्रसंचालन केलें जाल्यार शंकर चोडणकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
