भांगरभूंय | प्रतिनिधी
केरी- सत्तरीः चोर्ला घांटा वयल्या कळसा व्हाळांत दुर्मीळ असो ‘प्रदेशनिश्ट मलबार रूख भेक (बेब्या सारको झाडाचेर रावपी प्राणी)’ म्हणल्यार ‘इंडेमीक मलबार ट्री टोड’ सांपडला. केरी सत्तरीच्या विवेकानंद पर्यावरण जागृती फौजेचे कार्यकर्ते गजानन शेट्ये, विठोबा गावडे, चंद्रकांत अवखळे हे हालींच कणकुंबीच्या ‘कांबर वेस’ वाठारांत रातचे दिशा भोंवडे खातीर गेल्ले तेन्ना तांकां वयलो प्राणी दिसलो. प्राणी शास्त्रज्ञ गुरुराज के. व्ही. हांणी मलबार ट्री टोडची म्हायती आनी फोटे संकलीत मोहीम आंखल्या. ते प्रमाण वयल्या कार्यकर्त्यांनी चोर्ला घाटांत रात दिशा भोंवडी केल्ली.
मलबार ट्री टोड हो उभयचर प्राणी. पावसाळ्यांत तो ओलसर आशिल्लें झाडाचें तोड वा खांदयेर रावता. पावसाळ्या उपरांत तो खंय रावता आनी ताचें एकंदरीत जिवीत चक्रा विशीं खूब उणी म्हायती अभ्यासकांक आसा, अशें रानवटी जीव अभ्यासक गजानन शेट्ये हांणी सांगलें. मलबार ट्री टोड हो कर्नाटकाच्या प्रस्तावीत कळसा धरण प्रकल्पाच्या वाठारांत मेळ्ळा. थंयच्यान गोंयचें म्हादय अभयारण्य उल्याच्या अंतराचेर आसा. कर्नाटक सरकारा वतीन हातांत घेतिल्ल्या कळसा प्रकल्पा खाला धरणाचें बांदकाम जावपाचें आसा. जर तें धरण बांदलें जाल्यार ह्या प्राण्या सयत हेर उभयचर, जलचर, सुकणीं हांचे वांगडाच वाग, वास्वेल हांचेंय अस्तित्व धोक्यांत येतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
