भांगरभूंय | प्रतिनिधी
तामिळनाडूची राजधानी चेन्नय पसून 50 किमी अंतराचेर आशिल्ल्या मामल्लापुरमांत काल पसून चेस ऑलिम्पियाडाक सुरवात जाली. प्रधानमंत्री नरेंद्र मोदी हांणी 44वे चेस ऑलिम्पियाडाचें उक्तावण केलें. ह्या वेळार तामिळनाडूचे राज्यपाल आर एन रवी, मुख्यमंत्री एम के स्टालीन आनी खेळां मंत्री अनुराग ठाकूर, अभिनेतो रजनीकांत, ए आर रहमान हे मानेस्त जवाहरलाल नेहरू इन्डोर स्टेडियमांत जाल्ले उक्तावण सुवाळ्याक उपस्थीत आशिल्ले.
भारतीय खेळां मळा खातीर हो उत्कृश्ठ काळ चालू आसा. आमी ऑलिम्पीक, पॅरालिम्पीक सर्तींनी जैत जोडलें. आयज भारतांत 44वी चेस ऑलिम्पियाड आयोजीत करता. सगल्यांक परबीं अशें प्रधानमंत्री मोदी हांणी भाशणांत म्हणलें.
भारताचे स पंगड वांटो घेतले. भारताक अमेरिका, नॉर्वे, अझरबैजान ह्या खेळगड्यां कडल्यान आव्हान मेळुये. उक्त्या गटांत 188 आनी बायलांच्या गटांत 162 पंगड वांटेकार जातले.
पाकिस्तान सरलो फाटीं
पाकिस्तानाच्या पंगडान सर्तींतल्यान फाटीं सरपाचो निर्णय घेतलो. जम्मू-कश्मीरांतल्यान कार्यावळींतली मशाल रिले गेल्ल्याचो निशेध म्हणून पाकिस्तानान सर्तींतल्यान फाटीं सरपाचो निर्णय घेतलो. पाकिस्ताना खेरीत रशिया आनी चीन देशाचे खेळगडे वेगळ्यावेगळ्या कारणांक लागून सर्तींत खेळचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
