भांगरभूंय | प्रतिनिधी
प्रतीक शर्माः ‘टेबल टॉक्स’ कार्यावळींत कलाकार, तंत्रज्ञांनी मेकळीं केलीं मनां
भांगरभूंय । डीआयपी
पणजीः चित्रपट म्हणल्यार वेवसायीकरण न्हय. प्रेक्षकां कडेन भावनीक नातें जोडपी तें माध्यम. आपूण आपल्या चित्रपटा वरवीं समाजाक कितें तरी परतून दिवपाचो यत्न करता. सैम आनी लोकांक साक्षीदार म्हूण मनशाच्या जिविताचो भावनीक प्रवास दाखोवपाचो विचार आशिल्लो. ताका लागून हो संदेश तांकां मनरिजवण करपी पद्दतीन दाखोवपाक सोदतालों, अशें ‘लोटस ब्लूम्स’ ह्या आपल्या मैथिली फिचर फिल्मा फाटल्यान आशिल्ले प्रेरणे विशीं उलयतना दिग्दर्शक प्रतीक शर्मा हांणी सांगलें.
पीआयबीन आयोजीत केल्ल्या इफ्फी ‘टेबल टॉक्स’चो एक भाग म्हूण लोटस ब्लूम्साच्या कलाकारांनी आनी तंत्रज्ञांनी पत्रकार परिशद घेतिल्ली. त्या वेळार शर्मा उलयताले.
पटकथा लेखिका अस्मिता शर्मा हांणी ‘लोटस ब्लूम्स’ ह्या चित्रपटाचो सार सांगतना स्पश्ट केलें, सैम जें येवजिता तें दिताच. केन्ना केन्ना प्रत्यक्ष जाल्यार केन्ना केन्ना अप्रत्यक्ष रितीन. ताका लागून मनशाच्यो कितल्योय येवजण्यो आसल्यो तरी ताका अपेस येवं येता. हाकाच लागून जिणेचो प्रवास कठीण जाता. पूण सैमाक शरण येतकच समस्या चमत्कारीक तरेन सुटाव्योय जाता. ह्या प्रकल्पांत संदेश पावोवपा खातीर चित्रपटाची भास वापरिल्ल्यान आपणे ह्या प्रकल्पांत काम करपाचें थारायलें, अशें अभिनेतो अखिलेंद्र छत्रपती मिश्रा हांणी सांगलें. प्रादेशीक भाशांनी आनीक चित्रपट तयार जावपाक जाय. चित्रपट हें जिणेचें एक आंग. संस्कृती, भास आनी अध्यात्मीक नदर तातूंत आस्पावता, हेच खातीर तर ताका जिणे परस व्हड अशें म्हणटात, अशेंय तांणी स्पश्ट केलें.
संदेश उक्तावपा खातीर वापरलां संकेतशास्त्र
इफ्फींत भारतीय पॅनोरमा विभागांत ‘लोटस ब्लूम्स’ हो मैथिली भाशेंतलो चित्रपट दाखयलो. ह्या चित्रपटांत संदेश पावोवपा खातीर व्हड प्रमाणांत संकेतशास्त्राचो उपेग करून आवय आनी भुरग्याच्या नात्याची कथा दाखयल्या. ह्या सिनेमांत संवाद सामकेच उणे आसात. ह्या चित्रपटाचें शुटींग बिहारच्या भितरल्या वाठारांनी जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
