चित्रपट गुंतवणुकी खातीर खासा धोरण: मुख्यमंत्री

भांगरभूंय | प्रतिनिधी

मनरिजवण आनी भाशणांनी चित्रपट महोत्सवाचें दबाजान उक्तावण

2025चें उक्तावण सुसज्ज परिशदघरांत

गोंयांत फिल्म स्कूल जातलें

पणजी : गोंयांत चित्रपट निर्मिती जावची. चित्रपटांचें चित्रिकरण तशेंच चित्रपट निर्मीती उपरांत पोस्ट प्रॉडक्शनाची प्रक्रिया जावची, म्हूण सरकार साधनसुविधांची उबारणी करतलें. चित्रपट वेवसायांतले गुंतवणुके खातीर सरकार खासा धोरण तयार करतलें अशें मुख्यमंत्री डॉ. प्रमोद सावंत हांणी सांगलें. पणजेंत चित्रपट रसिकांचे हाजिरेंत 53व्या चित्रपट महोत्सवाचें व्हड दबाज्यान उक्तावण जालें.

केंद्रीय म्हायती आनी प्रसारण मंत्री अनुराग ठाकूर, राज्यपाल श्रीधरन पिल्लई, केंद्रीय म्हायती आनी प्रसारण राज्यमंत्री एल. मुरुगन, केंद्रीय पर्यटन राज्य मंत्री श्रीपाद नायक, म्हायती आनी प्रसारण मंत्रालयाचे सचीव अपूर्व चंद्रा, एनएफडीसीचे संचालक रवींद्र भाकर हांचे हाजेरीत चित्रपट महोत्सवाचें उक्तावण जालें. डॉ. श्यामाप्रसाद मुखर्जी स्टेडियमाचेर जाल्ले खासा कार्यावळींत अजय देवगण, सुनील शेट्टी, परेश रावल, प्रभू देवा, कार्तीक आर्यन ह्या सारख्या स्टार अभिनेत्यांचे हाजेरीक लागून उक्तावणाक ग्लॅमर आयलो. हो महोत्सव 28 नोव्हेंबर मेरेन चलतलो. इंडियन पॅनोरेमा, होमेजीस. काँपिटेशन सेक्शन सारख्या फांट्यांनी मेळून 400 परस चड चित्रपटांचें चित्रिकरण जातलें.

औपचारीक उक्तावणाचे कार्यावळी पयली अल्मा अॅण्ड ऑस्कर ह्या ऑस्ट्रियन चित्रपटाचें प्रदर्शन जालें. डिटर बर्नर हे ह्या चित्रपटाचे दिग्दर्शक आसात. प्रदर्शना पयलीं चित्रपटांतल्या कलाकारांक रेड कार्पेटाचेर येवकार दिलो. ह्या वेळार केंद्रीय म्हायती आनी प्रसारण मंत्री अनुराग ठाकुर हाजीर आशिल्ले.

जिणेगौरव पुरस्कार भेटयलो

चित्रपट महोत्सवांत दर वर्सा नामनेच्या निर्मात्याचो सत्यजीत रे जिणेगौरव पुरस्कारान भोवमान जाता. अंदूंचो जिणेगौरव पुरस्कार स्पेनाचे निर्माते कार्लोस सावरा हांकां फावो जालाे. पुरस्काराचो स्विकार करपाक ते हाजीर नाशिल्ले. तांचे पूत अन्ना सावरा हांणी पुरस्काराचो स्विकार केलो. कार्लोस सावरा हांणी स्क्रिकीचेर आपलो संदश वाचलो. हांव प्रवास करूंक शकना. पुरस्कारा खातीर हांव उपकारी आसा. महोत्सव आयोजकांक शुभेत्सा, असो संदेश तांणी दिलो. केंद्रीय म्हायती आनी प्रसारण मंत्री अनुराग ठाकुर आनी हेर मानेस्तांचे हाजेरींत जिणेगौरव पुरस्काराचे वितरण जालें.

गोंयांत दर्जेदार फिल्म स्कूल जातलें: मुख्यमंत्री

गोंय हो सोबीत वाठार आसा. पर्यटन थळा सयत गोंय हें गुंतवणुकी खातीर योग्य थळ आसा. मुळाव्या सुविधांची निर्मिती नेटान सुरू आसा. गोंयांत दर्जेदार फिल्म स्कूल तयार जातलें. अभिनय, चित्रिकरण, तंत्रज्ञान, पटकथा, दिग्दर्शन, मार्केटींग क्षेत्रातले वेवसायीक गोंयांत तयार जावपाक जाय. हे खातीर फिल्म स्कूल जावपाची गरज आसा.

गोंयांत चित्रपटांचें चित्रिकरण जाता. चित्रिकरणा सयत मार्केटींग तशेंच पोस्ट प्रॉडक्शन प्रक्रिया राज्यांत जावपाक जाय. चित्रपट उद्देजकांनी राज्यांत गुंतवणूक करपाक जाय. हे खातीर खासा धोरण तयार जातलें.

2025चो इफ्फी परिशदघरांत

दोना पावला परिशद घरा खातीर जाग्याची निवड केल्या. परिशद घर उबारपाची प्रक्रिया सुरू जाल्या. 2025चो महोत्सव परिशदघरांत जातलो. चित्रपट महोत्सव तशेंच हेर कार्यावळी खातीर संवसारीक दर्जाच्या परिशदघराची गरज आसा.

चित्रपट वाठारांत भारत

केंद्रबिंदू जावचो : ठाकूर

देशांत दर्जेदार चित्रपट तयार जायत आसात. चित्रपटांचो आशय, तंत्रज्ञानाचो वापर, निर्मिती हांचो दर्जो वाडोवन संवसारांत भारत हो चित्रपटांचो केंद्रबिंदू जावचो अशी आस्त केंद्रीय मंत्री अनुराग ठाकूर हांणी उक्तायली. देशाच्या स्वातंत्र्याक 75 वर्सां पुराय जाल्यांत. ते निमतान भारत अंदूं अमृत महोत्सव मनयता. अमृत महोत्सवी वर्सा अंदूंचो महोत्सव जाता. गोंय हें चित्रपटां खातीर योग्य थळ आसा. हाका लागून महोत्सवा खातीर हेर थळांचो विचार जावंक शकना.

देशांतले सर्वोत्कृश्ट चित्रपट पळोवपाची संद महोत्सवांत मेळटा. इंडियन पॅनोरेमा, काँपिटेशन सेक्शन तशेंच हेर फांट्यांत तरेकवार प्रकारचे चित्रपट पळोवपाची संद रसिकांक मेळटा. गाला प्रिमियर हो प्रकार पयलेच खेपे महोत्सवांत जाता. फ्रान्स देशाच्या स्वातंत्र्याक अंदूं 75 वर्सां जातात. ते निमतान फ्रान्सचो भोवमान म्हूण कंट्री फोकस फांट्यांत फ्रान्साची निवड जाल्या. हे खेपे इफ्फींत राज्यां तशेंच देशाची पॅव्हेलियना आसतलीं. वसुधैव कुटुंम्बकम ह्या तत्वाचेर आधारीत आमच्या देशाचे लोक एकठांय रावतात. चित्रपट हें लेगीत एक कुटुंब आसा अशें केंद्रीय मंत्री अनुरागसिंग ठाकूर हांणी सांगलें.

राजकारण्यां परस कलाकारांक

चड मान : राज्यपाल

देशांत राजकारण्यां परस चड मान कलाकारांक दितात. कला आनी खेळाचो देशांत सदांच भोवमान जायत आसा अशें राज्यपाल पी. एस. श्रीधरन पिल्लई हांणी सांगलें. 1947 वर्सा देश स्वतंत्र जालो. फाळणी उपरांत खूबशे कलाकार पाकिस्तानांत गेल्ले. दोन वर्सांनी पाकिस्तानांत गेल्ले सगले कलाकार परतून भारतांत आयले. कलेक भारतांत चड सन्मान मेळटा, हें हाचें फाटलें कारण आसा. भारतीय लोक हेर देशांनी लेगीत उंचेल्या पदांचेर पावल्यात. अमेरिकोचो उपाध्यक्ष भारतीय वंशाचो आसा. युकेचो प्रधानमंत्री भारतीय वंशाचो आसा. इंडोनेशिया देशांत कुबेर बँक, गरूड अॅरलायन्स अशीं भारतांतलीं नांवां आसात. भारताची वाटचाल विश्वगुरू जावपाचे दिकेन सुरू आसा अशें राज्यपाल पी एस श्रीधरन पिल्लई हांणी सांगलें.

केंद्रीय म्हायती आनी प्रसारण राज्य मंत्री एल. मुरूगन हांचे ह्या वेळार उलोवप जालें. चित्रपटाक भाशा, देश वा संस्कृतायेच्यो शिमो नासतात. 1913 सावन देशांत चित्रपट तयार जावपाक सुरवात जाली. राजा हरिश्चंद्र, दो भिगा जमीन, कागज के फुल अशे दर्जेदार चित्रपट स्वातंत्र्या पयलीं तयार जाले. दादासाहेब फाळके, व्ही. शांताराम, सत्यजीत रे ह्या सारक्या दिग्दर्शकांनी चित्रपटा खातीर व्हड योगदान दिलां. गोंयांत चित्रपट महोत्सव जावचो म्हूण आदले मुख्यमंत्री सर्गेस्त मनोहर पर्रीकार हांचें व्हड योगदान आसा अशें तांणी सांगलें.

चित्रपट चडान चड डेमोक्रॅटिक जावपाक लागला. देशाच्या सगळ्या वाठारातल्यान चित्रपटांत आता प्रतिभा येवपाक लागल्या.

मनोज वाजपेयी

हांव खोशी आसा. दुसऱ्याचे खोशयेंत म्हाका खोशी दिसता.

सुनील शेट्टी

​अभिनय, दिग्दर्शना सयत सगल्यो गजाली चित्रपटा खातीर म्हत्वाच्यो आसतात. दर एकल्यान आत्मविस्वास बाळगून स्वताच्या मार्गाची निवड करची.

अजय देवगण

जिवितांत म्हाका बरे पटकथा लेखक मेळ्ळे. बरे सहकलाकार मेळ्ळे. हाका लागून येस मेळ्ळें.

परेश रावल

गांधीजीं कडल्यान लिखाणा खातीर उर्बा मेळ्ळी.

विजयेंद्र प्रसाद

कलाकार, परिक्षक मंडळाचो भोवमान

अभिनेते, कलाकारांची उपस्थिती हें महोत्सवाचें खाशेलेपण आसा. उक्तावण सुवाळ्याक अजय देवगण, सुनील शेट्टी, परेश रावल, कार्तीक आर्यन हांकां आयकुपाची संद रसिकांक मेळ्ळी. मानेस्तां कडल्यान अजय देवगण, सुनील शेट्टी, मनोज वाजपेयी, परेश रावल, लेखक विजयेंद्र प्रसाद , कार्तीक आर्यन हांचो भोवमान जालो. ते भायर काँपिटेशन सेक्शनांत चित्रपटांची निवड करपी परिक्षकांचो लेगीत भोवमान जालो.

सर्गेस्त मनोहर पर्रीकाराचो उगडास

आदले मुख्यमंत्री सर्गेस्त मनोहर पर्रीकार हांच्या यत्नाक लागून गोंयांत इफ्फी आयलो. तांच्याच सरकारा वेळार साधनसुविधांची उबारणी जाली. मुख्यमंत्री डॉ. प्रमोद सावंत, केंद्रीय म्हायती आनी प्रसारण मंत्री अनुरागसिंग ठाकूर तशेंच केंद्रीय राज्यमंत्री एल. मुरूगन हांणी आपल्या उलाेवपांत मनोहर पर्रीकार हांचो उल्लेख केलो.