भांगरभूंय | प्रतिनिधी
पणजीः गोंय पुलिशेच्या घुंवळी वखदां विरोधी फाट्यान बुधवारा मध्यानरातीर चिखले धाड घालून ज्ञानेंद्र स्वाईन (38, ओरिसा) हाका अटक केली. ताचे कडल्यान 4 लाख 50 हजार रुपयांचो 4.5 किलो गांजो जप्त केलो. अटक केल्ल्या दुबाविताक वास्कोच्या प्रथमवर्ग न्यायालयान तीन दिसांची पुलीस कोठडी फर्मायल्या.
घुंवळे वखदां विरोधी पंगडान दिल्ले म्हायती प्रमाण वास्कोच्या चिखली जंक्शना लागसार घुंवळे वखदांची तस्करी करचे खातीर एक तरणाटो येवपाचो आसा, अशी म्हायती गुप्तहेरांनी पंगडाक दिल्ली. ते प्रमाण पंगडाचे पुलीस अधिक्षक शेखर प्रभुदेसाय आनी उपअधिक्षक हरिश्चंद्र मडकयकार हांच्या मार्गदर्शना खाला पुलीस निरिक्षक अरूण गांवस देसाय हांच्या फुडारपणा खाला पुलीस उपनिरिक्षक मंजुनाथ नायक, कॉ. संदेश वळवयकार, रुपेश कांदोळकार, प्रशांत सुतार, मयूर गावडे आनी हेर कर्मचाऱ्यांच्या पंगडान बुधवारा रातच्या 9.15 ते मध्यानरातीर 1 वरा मजगतीं चिखली जंक्शना लागसार सांपळो रचलो.
मजगतीं, गुप्तहेरांनी दिल्ले म्हायती प्रमाण एक तरणाटो थंय आयलो. पंगडान ताची झडटी घेतली तेन्ना ताचे कडेन 4 लाख 50 हजार रुपयांचो 4.5 किलो गांजो सांपडलो. ते उपरांत पंगडान ताची अदीक चवकशी केली तेन्ना ताचें नांव ज्ञानेंद्र स्वाईन आशिल्ल्याचें कळ्ळें.
ह्या प्रकरणांत महिला पुलीस उपनिरिक्षक प्रियंका गरोडी हांणी दुबाविता आड घुंवळे वखदां विरोधी कायद्या खाला गुन्यांव दाखल केलो आनी अटक केली. अटक केल्ल्या दुबाविताक पुलीस कोठडे खातीर बिरेस्तारा वास्कोच्या प्रथमवर्ग न्यायालयांत उबो केलो, तेन्ना न्यायालयान ताका तीन दिसांची पुलीस कोठडी फर्मायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
