भांगरभूंय | प्रतिनिधी
वास्को: चिखलीचें जॉगर्स पार्क हें फक्त वॉकींग पार्क नासून तें लोकांच्या भलायकेची काळजी घेवपी पार्क आसा. लोकांनी ताचो योग्य वापर करचो. ह्या पार्काची उबारणी आदले मुख्यमंत्री सर्गेस्त मनोहर पर्रीकार हांचे संकल्पनेंतल्यान साकार जाल्ली. हें पार्क चिखली कोमुनिदादीचे सुवातेर उबारलां. गोंयच्या हेर कोमुनिदादींनी चिखली पंचायतीचें उदाहरण दोळ्या मुखार दवरचें अशें आवाहन मुख्यमंत्री डॉ. प्रमोद सावंत हांणी केलें. गोंयच्या कोयराच्या समस्याचेर योग्य उपाय काडून नियंत्रण दवरपा खातीर आमचो यत्न आशिल्ल्याचें तांणी स्पश्ट केलें.
गोंय राज्य साधन सुविधा विकास म्हामंडळ आनी चिखली पंचायतीन उबारिल्ल्या जॉगर्स पार्काच्या दुसऱ्या टप्प्याचें लोकार्पण मुख्यमंत्री डॉ. प्रमोद सावंत हांचे हस्तुकीं काल (सोमारा) जालें. ह्या वेळार दाबोळीचे आमदार आनी पंचायत मंत्री मॉवीन गुदिन्हो, वास्कोचे आमदार कृष्णा साळकार, मुरगांवचे आमदार संकल्प आमोणकार, चिखलीचे सरपंच कमलाप्रसाद यादव, गोवा साधन सुविधा विकास म्हामंडळाचे वेवस्थापकी संचालक हरीष हणकोणकर, जिल्हो पंचायत वांगडी अॅड. अनिता थोरात, बोगमाळो सरपंच संकल्प महाले, सांकवाळचे उपसरपंच गिरीश पिल्ले, मुरगांवचे नगराध्यक्ष गिरीश बोरकार आनी हेर मानेस्त हाजीर आशिल्ले.
मॉवीन गुदिन्हो हांणी सांगलें, चिखली पंचायत वाठारांत जॉगर्स पार्काच्या दुसऱ्या टप्प्याच्या लोकार्पणा वेळार आदले मुख्यमंत्री सर्गेस्त पर्रीकार हांची याद येता. कारण तांणीच म्हाका जॉगर्स पार्काच्या पयल्या टप्प्याचें काम करपा खातीर पुराय तेंको दिल्लो. हाचे मुखार दाबोळी बरोबरूच पुराय मुरगांव म्हालाच्या विकासा खातीर यत्न करतलों.
आमदार संकल्प आमोणकार, आमदार कृष्णा साळकार हांणी लेगीत अशे तरेचो विकास आपल्या मतदारसंघात जावचो अशी इत्सा मुख्यमंत्र्या कडेन उक्तायली. कमला प्रसाद यादव हांणी येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
