भांगरभूंय | प्रतिनिधी
भांगरभूंय । प्रतिनिधी
पणजीः चवथीचे फांटभुंयेर राज्यांतल्या दुकानांत विरतात त्या मिठायेची तपासणी करपाचें काम अन्न आनी वखदां प्रशासन खात्यान (एफडीए) सुरू केलां. प्रशासनाच्या अधिकाऱ्यांनी फाटल्या सप्तकांत केपें, मडगांव, सांगें, तिसवाडी आनी बार्देश तालुक्यांतल्या मिठायेच्या दुकानांनी वचून मिठायेचे नमूने तपासणे खातीर हाडल्यात.
काजू खातली, काजू बर्फी, दूद केके, मोतीचूर लाडू, मलई पेढा, म्हैसूर पाक, बुंदी लाडू, बेसन लाडू हांचे नमूने एकाठांय करून हाडल्यात अशी म्हायती प्रशासनाचे सहाय्यक म्हायती अधिकारी रिचर्ड नऱ्होना हांणी दिली. प्रशासना वतीत राज्यांत हाडटात त्या मावाची बारकायेन तपासणी करतात. फाटल्या आयतारा मडगांव रेल्वे स्टेशनांत हाडिल्ल्या मावाची एफडीएच्या पंगडान तपासणी केली.
मिठाय तयार करतात त्या स उत्पादन युनिटांची आमी पळोवणी केली. एक युनिट नितळसाण नाशिल्ल्यान बंद केलें. ह्या युनिटांतले 11 नमूने तपासणे खातीर हाडल्यात अशें नऱ्होना हांणी सांगलें. सांग्यांच्यान चिवडा, खारेबाटी, मसाला भिकणा, चण्याचे नमून तपासपा खातीर हाडल्यात. एक्स्पायरी तारीख जावंन गेल्लें 20 किलो मीठ आनी लेबल नाशिल्ली 20 किलो बर्फी नश्ट केली अशें तांणी सांगलें.
नव्या आनी पोरण्यो काजू बियो मिक्स करून विकतात अश्यो कागाळी आयिल्ल्यान बिरेस्तारा कळंगुटे हांगा तपासणी मोहीम सुरु केल्ली. लेबलींग आनी आकार सारको नाशिल्ल्यो काजू बियो विकपी दुकानदारांचेर एफडीएन कारवाय केल्या. कळंगुटे आनी सरभोंवतणच्या वाठारांतल्या काजू बियो विकपी दुकानांची तपासणी करपाचें काम सुरू आसतलें. कळंगुटेचो सरपंच जोजेफ सिक्वेरा हांणी सगळें सहकार्य करपाचें उतर दिलां अशें नऱ्होना हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
