भांगरभूंय | प्रतिनिधी
म्हापशें, प्रतिनिधी ः गोंय पुलिसांच्या घुंवळे वखदां विरोधी पंगडान आयज धाड घालून 55 लाखांचीं घुंवळे वखदां जप्त केल्यांत. हातूंत 30 किलो गांजा आनी 5 किलो चरस हांचो आस्पाव आसा. ह्या प्रकरणांत पंगडान दुबावीत मनीष महाडेश्वर (44, म्हापशें) हाका अटक केल्या. पुलिसांनी ताची ‘आय- 10’ गाडी आनी 50 हजार रुपयाय जप्त केल्यात.
आयज सकाळीं मनीष गाडयेन ड्रग्स हाडपाचो आसा अशी म्हायती पुलिसांक मेळ्ळी. ते प्रमाण फांतोडेर म्हापशें- पर्वरे म्हामार्गाचेर ताका धरलो. मुळावो तपास केलो तेन्ना ताचो संबंद आंतरराज्य ड्रग्स तस्करां कडेन आशिल्ल्याचें दिसून आयलें आनी हो गट कर्नाटकांतल्यान गांजो आनी हिमाचल प्रदेशांतल्या दोंगराळ वाठारांतल्यान चरसाची तस्करी करता अशें कळ्ळें. हातूंत गोंयचे आनीक कांय जाण घुस्पल्ले आसतले, असो दुबाव पुलिसांक आसा.
मजगतीं हे धाडींत ताच्या कडेन 30 किलो गांजा आनी 5 किलो चरस मेळ्ळो. ताचें बाजारांतलें मोल 55 लाख आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
