भांगरभूंय | प्रतिनिधी
दाबोळे घडलो प्रकार; ती थंय पावली कशी? हो प्रस्न
वास्को: दाबोळे वटेन आशिल्ल्या ग्रेड सेपरेटराच्या (उड्डाण पूल) खांब्याच्या उंचा वयल्या दोन भागां मदीं चडिल्ले एके बायलेक वास्को उजो पालोवपी दळाच्या जवानांनी सुखरूप सकयल देंवयली. ही बायल पुलाच्या उंच खांब्या मदल्या भागांत गेली कशी हो प्रस्न मात दरेकाक पडला. ते संबंदी विवीध प्रतिक्रिया उक्तायताले. पूण त्या ग्रेड सेपरेटराचो मदलो भाग पोकळ आसून तातूंत वचपा खातीर सेपरेटराच्या निमाण्या तोंका कुशीक एक व्हडलो बुराक आसा. तातूंतल्यान ती भितर गेली. पूण ती थंय कित्या खातीर पावली हो प्रस्न मात सुटिल्लो ना.
ग्रेड सेपरेटराच्या सकयल्या भागांतल्या रस्त्या कुशीक टॅक्सीकार आपल्यो टॅक्सी उब्यो करतात. मंगळारा सकाळीं आठाच्या सुमाराक थंय आयिल्ल्या एका टॅक्सीकाराचे नदरेक सेपरेटराच्या खांब्याचे मेकळे सुवातेंत कसली तरी हालचाल दिसली. ताणें बारीकसाणेन पळयलें तेन्ना थंय एक बायल उबी आशिल्ल्याचें दिसून आयलें. तांणी ही गजाल हेरांक सांगलीं.
उपरांत तांणी पुलीस आनी उजो पालोवपी दळाक फोन केलो. म्हायती मेळटकूच पुलीस आनी दळाचे जवान थंय पावले. थंय दळाचे जवान त्या भागांत गेले. तांणी ते बायलेक विनंती केले उपरांत ती निसणी वयल्यान सकयल देंवपाक तयार जाली. तिका सुखरूपणान सकयल देंवयली. आपूण कारवारची आसून आपणाक कोणे तरी काम दिता अशें सांगून आपली फटवणूक केली. आपले कडेन पयशेय नाशिल्ल्याचें तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
