गोवा राज्य सहकारी बँकेच्या घर रिणांत जातली वाड

भांगरभूंय | प्रतिनिधी

उल्हास फळदेसायः 25 लाखांची मर्यादा दुपेटीन जावये

भांगरभूंय । प्रतिनिधी

पणजीः गोवा राज्य सहकारी बँकेची घरा खातीर रिणाची मर्यादा दुपेटीन वाडयल्या. हाचे आदीं बँके कडल्यान एके व्यक्तीक 25 लाख रुपया घर रीण मेळटालें. आतां ही मर्यादा 50 लाख मेरेन वाडयल्या. बँकेचे अध्यक्ष उल्हास फळदेसाय हांणी बुधवारा पत्रकार परिशदेंत ही म्हायती दिली.

केंद्र सरकारान देशांतल्या सगलीं 33 राज्य सहकारी बँकांची घरां खातीरची रीण मर्यादा वाडयल्या. गोवा राज्य सहकारी बँकेचे रीण मर्यादेंत आनीक 25 लाखांची वाड जावपाक शकता, अशें फळदेसाय हांणी सांगलें.
नाबार्डा वतीन बँकेची निरिक्षण प्रक्रिया पुराय जाल्या. आतां हे विशींचो अहवाल नाबार्ड सादर करतले. नाबार्डान सकारात्मक अहवाल सादर केल्यार बँक 75 लाखांचें घर रीण दिवपाक शकता. फुडल्या कांय दिसांत हे विशींचो अहवाल येवपाक शकता. राज्यांतल्या नागरिकांचें आधार कार्ड, पॅनकार्ड तशेंच हेर कागदपत्रां थळाव्या नाम्याचेर आसात, अशें नागरीक ह्या रिणा खातीर पात्र थारतले. कळंतर दर हो हेर बँका प्रमाणूच आसतलो. तशेंच रिणा खातीर पात्र जावपाक गरजेचीं कागदपत्रां, घर बांदपा खातीर जागेचो आराखडो, म्हानगरपालिका वा ग्रामपंचायतीची परवानगी, नगरनियोजन खात्याची परवानगी आनी हेर कागदपत्रां तपासले उपरांतूच रीण मंजूर करतले, अशी म्हायती फळदेसाय हांणी दिली.

गोवा राज्य सहकारी बँकेक 7 कोटींचो फायदो

पणजीः गोवा राज्य सहकारी बँकेक अंदूं 6 कोटी 95 लाखांचो फायदो जाला. बँकेचो ऑपरेटींग फायदो 20 कोटी 5 लाख जाला. पोरूं वट्ट फायदो 1 कोटी वयर जाल्लो. मात अंदूं सगल्या प्रकारांचें लुकसाण भरून काडलां. बँक आतां स्थीर जाल्या. हातूंत संचालक मंडळाचें व्हड योगदान आसा, अशें बँकेचे अध्यक्ष उल्हास फळदेसाय हांणी सांगलें. बँकेंतली वट्ट गुंतवणूक आनी एडव्हॉन्स अशा वेव्हारांची तांणी म्हायती दिली.

31 मार्च मेरेन बँकेचें स्थलांतरः फळदेसाय

बदलत्या काळा प्रमाण बँकेंत विवीध डिजिटल सुविधा (मबैयल बँकींग, इंटरनॅट बँकींग, एप बँकींग) उपलब्ध करचे खातीर आमी सरकारा कडेन प्रस्ताव दिला. मंजुरी मेळ्ळे परांत आमी स्थलांतर करून सगल्यो सुविधा उपलब्ध करतले. 31 मार्चा आदीं ही प्रक्रिया पुराय जातली, अशें उल्हास फळदेसाय हांणी सांगलें.