गोवा डेरीचेर राजेश फळदेसाय पॅनेल

भांगरभूंय | प्रतिनिधी

9 उमेदवार जैतिवंत, अध्यक्ष निवडी खातीर न्यायालयाचो निर्णय म्हत्वाचो

फोंडें: गोवा डेरीच्या संचालकपदा खातीर आयतारा जाल्ले अटीतटीचे लडटींत आदले अध्यक्ष राजेश फळदेसाय हांच्या पॅनेलान भोवमतान जैत मेळयलें. हे वेंचणुकेची मतमेजणी सोमारा जाली. 12 उमेदवारांतल्यान 9 उमेदवार राजेश फळदेसाय हांच्या पॅनेलांतले जैतिवंत जाल्यात. नव्या संचालक मंडळांत 9 पोरण्यां जाल्यार तीन नव्या चेऱ्यांचो आस्पाव आसा. वेंचून आयिल्ल्या कांय संचालका आड न्यायालयांत प्रकरणां प्रलंबीत आसात. ते खातीर संचालक निवडी खातीर न्यायालयाचो निर्णय म्हत्वाचो थारतलो.
गोवा डेरीच्या संचालक मंडळा खातीरचे वेंचणुकेंत 167तल्यान 166 मतदारांनी मतदान केल्लें. वेंचणुकेंत तीन आदल्या अध्यक्षांनी आपले पॅनेल रिंगणांत देंवयिल्ले. हातूंत राजेश फळदेसाय हांच्या पॅनेलांतल्या 9 जाणांनी जैत मेळयलें. आदले अध्यक्ष श्रीकांत नायक आनी विकास प्रभू हांकां दरेकी 54 मतां मेळिल्ल्यान ‘टॉस’ उडोवपाचो निर्णय निर्वाचन अधिकारी राजू मगदूम हांणी घेतलो.
हातूंत श्रीकांत नायक जैतिवंत जाले. वेंचणुकेंत उल्हास सिनारी (80), राजेश फळदेसाय (79), विठोबा देसाय (78), विजयकांत गांवकार (75), गुरूदास के. परब (70), माधव सहकारी (69), बाबुराव फट्टो देसाय (67), उदय प्रभू (63), नितीन प्रभुगांवकार (62), बाबू फालो (60), अनुप देसाय (58) आनी श्रीकांत नायक (54) हांकां मतां मेळ्ळी.
आदले अध्यक्ष माधव सहकारी, दिपाजी सरदेसाय, ज्ञानेश्वर सावंत, दुर्गेश शिरोडकार, प्रमोद सिद्धये, विस्वास सुखठणकार, उल्हास सिनारी, राजेश फळदेसाय, रवींद्र फळदेसाय, मंगेश कायतान फर्नांडीस, बाबू फालो, असेलमो फुर्तादो, विजयकांत गांवकार, प्रकाश जल्मी, निलेश मलीक, गोविंद नायक, श्रीकांत नायक, आदिनाथ परब, गुरुदास केशव परब, गुरुदास शांताराम परब, मदन परब, वैभव परब, संदेश पाटील, शिवानंद पेडणेंकार, उदय प्रभू, विकास प्रभू, नितीन प्रभुगांवकार, नवसो आरोलकार, चंद्रकांत भाटीकार, अजय देसाय, अनुप देसाय, भागिरथी देसाय, धनंजय देसाय, संदीप देसाय, बाबुराव फट्टो देसाय, विठोबा देसाय, सुधीर धाऊसकार आनी दयानंद फळदेसाय हे 38 उमेदवार वेंचणूक रिंगणांत आशिल्ले.