भांगरभूंय | प्रतिनिधी
बायलांचे संवसारीक हॉकी सर्ती खातीर भारताच्या पंगडाची काल घोशणा केली. 20 वांगड्यांच्या पंगडाचें फुडारपण राणी रामपालाचे गैरहाजेरेंत सविता पुनिया करतली. जाल्यार दीप ग्रेस एक्का उप मुखेली आसतली. सर्तीचें आयोजन स्पेन आनी नॅदरलॅण्ड ह्या देशांनी जोड रितीन 1 जुलय ते 17 जुलय मेरेन केलां.
सदची मुखेली राणी रामपाल जखमी आशिल्ल्यान तिची निवड करूंक ना. राणी रामपालाच्याच फुडारपणाखाला भारताच्या बायलांच्या हॉकी पंगडान टोकियो ऑलिम्पिकांत चवथी सुवात मेळयिल्ली. म्हत्वाचे सर्ती खातीर राणी नासप भारता खातीर खर धपको आसा. राणी रामपालाक सोडली जाल्यार टोकियो ऑलिम्पिकांत खेळिल्ल्या सगल्या खेळगडयांची निवड केल्या.
भारताक ब गटांत इंग्लंड, न्युझिलॅण्ड आनी चीन ह्या पंगडां वांगडा दवरला. भारताची पयली मॅच इंग्लंड आड जातली. टोकियो ऑलिम्पिकांत कांश्या पदका खातीर जाल्ले मॅचींत भारताचो पंगड इंग्लंडा आड हारिल्लो.
भारत गटांतल्यो सगल्यो मॅची एमस्टेलवीनांत खेळटलो.
पंगडः (गोलकीपर) सविता (मुखेली), बिचू देवी खरीबामी, (डिफॅण्डर्स) दीप ग्रेस एक्का (उप मुखेली), गुरजीत कौर, निक्की प्रधान, उदिता, (मिडफिल्डर) निशा, सुशीला चानू पुखरामबम, मोनिका, नेहा, ज्योती, नवजोत कौर, सोनिका, सलिमा टेटे, (फॉरवर्ड) वंदना कटारिया, लालरेम्सियामी, नवनीत कौर, शर्मिला देवी, (राखीव खेळगडयो) अक्षता अबसो ढेकाले, संगीता कुमारी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
