भांगरभूंय | प्रतिनिधी
जमशेदपूराच्या कीनन स्टेडियमाचेर चालू आशिल्ले सी गटांतले रणजी मॅचींत येजमान झारखंड पंगडान गोंया आड खेळटना आपल्या पयल्या डावांत सगल्यो विकेटी वगडावन 386 धांवड्यो केल्यो. ते उपरांत दुसऱ्या दिसाचो खेळ सोंप मेरेन गोंय पंगडान आपल्या पयल्या डावांत 4 विकेटी वगडावन 99 धांवड्यो केल्या. अशे तरेन तो झारखंडा परस अजून 287 धांवड्यांनी फाटीं आसा.
ओपनर सुमिरन आमोणकार आनी अमोघ देसाय हांणी दरेकी 41 धांवड्यांची खेळी केली. सुयश प्रभुदेसायान 2, अर्जुन तेंडुलकरान 1 धांवडी केली. स्नेहल कवठणकार 6 आनी सिद्धेश लाड 4 धांवड्यो करून खेळपट्टीचेर आसा.
ते पयलीं झारखंडान काल सकाळीं 4 बाद 280 धांवड्यां वयल्यान मुखार खेळपाक सुरवात केली आनी उरिल्ल्या स बॅट्समनांनी 106 धांवड्यांची भर घाली. ताच्या विकेटकीपर बॅट्समन कुमार कुशग्रान सगल्यांत चड 96 धांवड्यो केल्यो. ताका चार धांवड्यांनी शेंकडो चुकलो.
गोंया वतीन दर्शन मिशाळान 68 धांवड्यो दिवन 4 विकेटी घेतल्यो. जाल्यार मोहित रेडकारान 125 धांवड्यांनी 3 विकेटी मेळोवपाक येस मेळयलें. लक्ष्य गर्गाक दोन आनी अर्जुन तेंडुलकराक एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
