भांगरभूंय | प्रतिनिधी
भांगरभूंय । प्रतिनिधी
मुरगांवः गोंय शिपयार्डान फूटपाथाचेर अतिक्रमक केलां. चंम्पा आनी मोगरा गेटी कडेन रस्त्यार सुमार 100 मीटर अतिक्रमण केल्ल्यान लोकांक चड करून विद्यार्थ्यांक रस्तो हुप्पास त्रास जाता अशी कागाळ गोंय फस्टाचो निमंत्रक परशुराम सोनुर्लेकारान दक्षीण गोंय जिल्होधिकारी, दक्षीण गोंय येरादारी पुलीस अधिक्षक, राष्ट्रीय म्हामार्ग प्राधिकरकण, बांदकाम खातें तशेंच मुरगांवचो उपजिल्होधिकारी आनी मुरगांव पालिकेंत केल्या. अतिक्रमण केल्ली सुवात शिपयार्डाक मेकळी करपाक लावची अशें तांणी मागलां.
म्हामार्ग कायद्या खाला रस्त्या कुशीकचो 3 मीटर सुवात मेकळी सोडची पडटा. ताणी अतिक्रमण केल्ले सुवातेंत तशेंच बसस्टोपा वाठारांत लोक आपल्यो दुचाकी पार्क करून दवोरतात. ताका लागून प्रवाशांक बशीच चडपाक आडमेळे येतात अशें सोनुर्लेकारान संबंदितांचें नदरेक हाडून दिला. शिपयार्डा सामकार आशिल्ल्या रस्त्याचेर अवजड वाहनांचीं वर्दळ आसता. ते खातीर ताणी बांदिल्ली राखणे वटन तीन मीटर भितर घेवपाक जाय. ही वणत म्हणल्यार एक तरेचें अतिक्रमण आशिल्ल्यान ताचे आड कारवाय करपाची मागणी तांणे केल्या.
राखणे वटत तीन मीटर भिरत घेतल्यार शिपयार्डाचे सुरक्षेक कसलोच धोको उप्रासचो ना. शिपयार्डा सरभोंवतणी केंद्रीय उद्देगीक सुरक्षा दलाचे जवान 24 वरां पारो दितात. तेन्ना राखणे वण्टी वयल्यान शिपयार्डांत वचपाचो प्रश्नूच येना असो सोनुर्लेकाराचो दावो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
