भांगरभूंय | प्रतिनिधी
आयज सावन उमेदवारी अर्ज मेळटलो भरूंक
पणजी: गोंय प्रदेश युवक काँग्रेसीची सभासद नोंदणी आनी विवीध समित्यां खातीर वेंचणूक जाहीर जाल्या. पणजेंतल्या चेंबर ऑफ कॉमर्स सभाघरांत अनावरण कार्यावळ जाली.
ह्या वेळार गोंय प्रदेश युवक काँग्रेसीचे अध्यक्ष वरद म्हाड्डोळकार, काँग्रेस प्रदेशाध्यक्ष अमीत पाटकार, उपाध्यक्ष एमके शेख, प्रदेश युवक काँग्रेसीच्यो राज्य प्रभारी रुची भार्गव, वेंचणूक आयुक्त व्यंकटेश वेग्गी, विद्यार्थी संघटणा मुखेली नौशाद चौधरी, प्रदेश रिटर्नींग अधिकारी जसप्रीत सिंग, सुनील शर्मा, सावियो डिसिल्वा बी मानेस्त हाजीर आशिल्ले.
सोमारा युवक काँग्रेसीच्या जिल्हो, राज्य आनी विधानसभा पांवड्या वयल्यो सगल्यो समित्यो बरखास्त केल्यो. मंगळारा सावन सगल्या समित्यांचे वेंचणुके खातीर उमेदवारी अर्ज भरपाक सुरवात जातली. 12 सप्टेंबर मेरेन उमेदवारी अर्ज भरूंक मेळटले. 13 वेर अर्जा संबंदी आव्हान करपाचें आसत जाल्यार करूंक मेळटलें. 14 वेर निमाणी उमेदवारी अर्जांची वळेरी ऑनलायन रितीन काँग्रेसीच्या वॅबसायट तशेंच अॅपाचेर घालतले. 21 सप्टेंबर ते 21 ऑक्टोबर ह्या काळांत सभासद नोंदणी करूंक मेळटली अशी म्हायती वेंचणूक आयुक्त वेग्गी हांणी दिली.
18 ते 35 वर्सां पिराये गटांतलो कोणूय उमेदवारी खातीर अर्ज करूंक शकता अशेंय तांणी म्हणलें. 4 सप्टेंबर 1986 ते 4 सप्टेंबर 2004 मजगतीं, जल्म जाल्ली खंयचीय व्यक्ती अर्ज करूंक शकतली.
सभासद नोंदणे खातीर 50 रुपया शुल्क आसून ऑनलायन पद्दतीन नोंदणेची सुविधा उपलब्ध करून दिल्या. तशेंच अॅपार ही नोंदणी करूंक मेळटली अशेंय वेग्गी हांणी म्हणलें.
राष्ट्रीय युवक काँग्रेस ही संवसारांतली सगल्यांत मोटी संघटणा आसा. ह्या माध्यमांतल्यान तरणाटे आपले प्रस्न मांडूंक शकतात. ताका लागून राज्यांतल्या चडांत चड तरणाट्यांनी सभासद जावचें अशें आवाहन प्रदेशाध्यक्ष अमीत पाटकार हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
