भांगरभूंय | प्रतिनिधी
2500 सरकारी, खाजगी सीसीटीव्ही कॅमेऱ्यांचें मॅपींग
पणजी: गोंय पुलिसांनी ‘नेत्र’ ह्या उपक्रमा खाला गोंयांतल्या सुमार 2500 सरकारी तशेंच खाजगी सीसीटीव्ही कॅमेऱ्यांचें मॅपींग केलां. हाका लागून फुडारांत त्या वाठारांतल्या गुन्यांवांचो तपास करपाक मजत जातली अशी म्हायती पुलीस म्हासंचालक अलोक कुमार हांणी दिली. मंगळारा पुलीस मुख्यालयांत ‘नेत्र’ प्रकल्पाचें अनावरण केलें. ह्या वेळार पुलीस म्हानिरिक्षक ओमवीर सिंग बिष्णोई, उत्तर गोंय पुलीस अधिक्षक अक्षत कौशल, दक्षीण गोंय पुलीस अधिक्षक सुनिता सावंत, गुन्यांव फांट्याचे अधिक्षक राहूल गुप्ता, पुलीस उपअधिक्षक टिकम सिंह वर्मा आनी हेर अधिकारी हाजीर आशिल्ले.
अलोक कुमार हांणी सांगलें, ‘नेत्र’ हाका लागून गोंय पुलिसांची सगली कडेन नदर उरतली. हातूंत पुराय राज्यांतल्या मुखेल सुवातांनी तशेंच मुखेल रस्त्यांचेर आशिल्ल्या सीसीटीव्ही केमेऱ्यांची नोंद केल्या. त्या कॅमेऱ्यांचे धनी, तांचे संपर्क क्रमांक, कॅमेऱ्याची बॅकअप तांक कितल्या दिसांची आसा, कॅमेऱ्यांत त्या वाठारांतलें कितलें कव्हरेज जालां, रस्त्या वेलें कव्हरजे आसा? कॅमेरा नेटवर्का कडेन जोडला? हाची म्हायती एकठांय केल्या. एखाद्या वाठारांत गुन्यांव घडल्यार मॅपिंगेच्या म्हायतीच्या आदारान थंय खंयचो सीसीटीव्ही कार्यरत आसा हें रोखडेंच समजतलें. सद्या हो उपक्रम मुळाव्या पांवड्यार आसा.
हाचे मुखार नोंदणी केल्ले सगले कॅमेरा एका नेटवर्कांत जोडपाचो आमचो विचार आसा. हाका लागून पुलिसांक त्या वाठारांतल्या सीसीटीव्ही कॅमेऱ्यांत रेकॉर्ड केल्ली म्हायती अॅप वा संकेतथळा वरवीं मेळटली. हाचो गैरवापर जावचो न्हय हे खातीर फक्त पुलिसांकूच वापर करूंक मेळटलो. फुडल्या कांय काळांत राज्यांतले हेर कॅमेरा लेगीत ह्या ‘नेत्र’ प्रकल्पांत हाडपाचो आमचो यत्न आसतलो. हो प्रकल्प येरादारी नियंत्रण, गुन्यांवांचो तपास लावप, एखाद्याच्या मालमत्तेचे जावपी लुकसाण टाळप, अपघात आडावप, पुरावे एकठांय करप, सेगीत नदर दवरपा खातीर उपेगी थारतले अशें अलोक कुमार हांणी स्पश्ट केलें.
पुलिसांच्या व्हॉट्सप, यू ट्यूब चॅनलाचें अनावरण
ह्या वेळार गोंय पुलिसांच्या व्हॉट्सप, यू ट्यूब चॅनलाचें अनावरण केलें. हे विशीं अलोक कुमार हांणी सांगलें, व्हॉट्सप चॅनला वरवीं सामान्य नागरिकांक येरादारी वा हेर आपत्कालीन परिस्थितीचे अलर्ट दितले. हे वरवीं तपास लायिल्ल्या गुन्यांवांची म्हायती दितले. तशेंच रस्तो सुरक्षा, सायबर सुरक्षा आनी घुंवळे वखदांचे घात हे विशीं जागृताय करतले. यू ट्युबा वरवीं शिक्षणीक कंटेन्ट तयार करून जागृताय करप, पुलीस अधिक्षकां बरोबर लायव्ह सेशन करप अशे उपक्रम करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
