भांगरभूंय | प्रतिनिधी
पणजी : गोंय हें नामनेचें पर्यटन केंद्र आसा. आतां तें नामनेचें तंत्रज्ञान केंद्र जातलें. तंत्रज्ञानाचें केंद्र जावपाचे दिकेन गोंयची वाटचाल सुरू आसा अशें मुख्यमंत्री डॉ. प्रमोद सावंत हांणी सांगलें. ते आयतारा गोवा चेंबराच्या डेव्हेलोपर समीट कार्यावळींत उलयताले.
2025 मेरेन देशांत 14 ते 19 लाख आयटी वेवसायिकांचो उणाव जातलो असो अदमास आसा. हो उणाव भरून काडपा खातीर गोंयान फुडे सरपाची गरज आसा. आयटी तशेंच कुशळटाय विकसीत करपी मोहीम गोंयांत सुरू आसा. आयटीआय संस्थांनी कुशळटाय अभ्यासक्रम सुरू जाल्या. आयटी तशेंच हेर प्रशिक्षण दिवपा खातीर सरकारान हालींच समजिकायेची कबलात केल्या. कोडींग तशेंच आयटीचें ज्ञान फुकट मेळपाची सोय जातली. राज्यान आयटी धोरण तयार केलां. स्टार्ट धोरण सुरू जावन स्टार्ट अप सुरू जावपाक लागलां. तंत्रज्ञान तशेंच आयटी शिक्षणांत गोंयान व्हड पावलां उखल्ल्यांत. हाका लागून फुडाराक कुशळ मनीसबळाचो उणाव जावचो ना. गोंय हें तंत्रज्ञानाचें केंद्र जातलें. आता मोपा विमानतळ तयार जाता. राज्यांत बंदर तशेंच रेल्वे सेवा आसा. पूल तशेंच म्हामार्गाचीं कामां सुरू आसात. गोंय हें महत्वाचें लॉजिस्टीक हब जातलें. लॉजिस्टीक हबाक लागून भाेवराष्ट्रीय कंपनीं गोंयांत येतल्यो. आयटी कंपनीं येवच्यो म्हूण सरकाराचे यत्न सुरू आसात. स्टार्ट अप धोरणाक लागून गोंयांत लेगीत स्टार्ट अप सुरू जावपाक लागलां. स्टार्ट अपाक लागून आयटी वाठारांत रोजगाराच्यो संदी तयार जातल्यो. गोंयांत नामनेच्यो फार्मास्युटीकल कंपनीं आसात. पर्यटनांत लेगीत नवीन संद तयार जायत आसा. आतां आयटी आनी उत्पादन वाठारांत रोजगार तयार जातले. आयटी तशेंच उत्पादन कंपनींक पुरक अशें मनीसबळ तयार करपाची गरज आसा. हाचे खातीर आयटी, आयटीआय तशेंच कुशळटायेचे अभ्यासक्रम पुरक थारतले.
प्रधानमंत्री नरेंद्र मोदी हांणी आत्मनिर्भर भारताचो नारो दिला. गोंयांत स्वयंपूर्ण गोंय मोहीम सुरू केल्या. स्वच्छ भारता सयत स्कील इंडिया, फीट इंडिया अश्यो मोहिमो प्रधानमंत्र्यांनी सुरू केल्यो. गोंयांतल्यान लेगीत ह्या मोहिमांक बरो प्रतिसाद मेळ्ळो. दूद, भाजी, नुस्तें, फळां ह्या वाठारां सयत तंत्रज्ञानांत लेगीत गोंयान स्वयंपूर्ण जावपाक जाय. गोंय स्वयंपूर्ण जावचें म्हूण सगल्या वाठारांनी स्वयंपूर्ण मित्रांची नेमणूक केल्या.
गोंया सयत देशांत तरणाट्यांचो आंकडो मोटो आसा. तरणाट्यांक कुशळटायेचे धडे दिले जाल्यार देश उदरगतीचे दिकेन नेटान फुडें वतलो अशें मुख्यमंत्री डॉ. प्रमोद सावंत हांणी सांगलें.
माचयेर पावपाची आस्त जाय
डेव्हेलोपर समीट कार्यावळींत फुडल्यो खुर्च्यो रित्यो आशिल्ल्यो. सगले फांटी बशिल्ले. मुख्यमंत्री डॉ. प्रमोद सावंत हांणी सगल्यांक फुडें येवपाचें आवाहन केलें. बॅक बॅंचर्स जावं नाकात. वर्गांत हांव सदांच फुडें बसतालो. स्टेजीचेर पावपाची म्हाका उमेद आशिल्ली. निमणें हांव स्टेजीर पावलों. तुमी फुडें बसात. काय दिसांनी स्टेजीर तुमी पावूंक शकतात. स्टेजीर पावून म्हजे कदेलार बसले तरी म्हाका दुख्ख ना. उरफाटी उमेद जातली अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
