भांगरभूंय | प्रतिनिधी
सुदिन ढवळीकारः दरेकल्यान घरांचेर सौर पॅनल बसोवपाचो उलो
भांगरभूंय । प्रतिनिधी
दिवचलः 2030 मेरेन भारतांतली वीज निर्मिती ही प्रदुशण विरयत जावची हे खातीर सरकारान आतांच्यानूच यत्न सुरू केल्यात. देशांतली 50 टक्के वीज ही ग्रीन वीज करपाचें धोरण आंखला. ही मोख पुराय करचे खातीर हे मोहिमेंत दरेकल्यान योगदान दिवपाची गरज आसा. ते खातीर सौरउर्जा निर्मितींत दरेकल्यान सरकाराक आदार दिवन आपापल्या घरांचेर सौरउर्जा पॅनल बसोवचे. ताका लागून सरकारी विजेचो ताण उणो जातलो आनी गिरायकांक विजेच्या बिलांनी खूब फायदोय जातलो. असो दोट्टी लाव घेवन आमचें पर्यावरण सांबाळपा खातीर सगळ्यांनी मुखार सरचें, असो उलो वीज मंत्री सुदिन ढवळीकार हांणी मारलो.
दिवचलच्या हिराबाई झांट्ये यादस्तीक सभाघरांत आयोजीत केंद्र सरकाराचे उज्वल भारत उज्वल फुडार हे कार्यावळींत मंत्री ढवळीकार उलयताले.
ह्या वेळार माचयेर दिवचलचे आमदार डॉ. चंद्रकांत शेट्ये, दिवचलचे नगराध्यक्ष कुंदन फळारी, दिवचलचे उपजिल्होधिकारी रोहन कांसकार, वीज खात्याचे सचीव राजशेखर, अधिक्षक अभियंते स्टिफन फर्नांडीस, अभियंते शैलेश बुर्ये, वल्लभ सामंत आनी हेर मानेस्त हाजीर आशिल्ले.
शेतकारांक सैरउर्जा पंच 90 टक्के सवलतीच्या दरांत मेळटात. तांणी ते येवजणेचो लाव घेवन सरकारी विजेक लागून जावपी खर्च वाटावचो आनी शेतांतल्या पिकांचो फायदो घेवचो, असो उलो मंत्री ढवळीकार हांणी मारलो.
हे कार्यावळींत केंद्र सरकाराच्या विवीध येवजण्यांची म्हायती दिवपी, विजेच्या वापराचेर तशेंच वीज जागृती करपी विवीध लघुपट दाखयले. तेचवरी विवीध येवजण्यांची म्हायती दिवपी पुस्तिकाय उजवाडायली.
आमदार डॉ. शेट्ये हांणी सांगलें, गोंयाक विजेच्या मळार आत्मनिर्भर जावप गरजेचें आसा. सध्या भायल्यान घेतात ते विजेक लागून खूबशा समस्यांक फुडो करचो पडटा. देशांत आनी राज्यांत खात्या वतीन सौरउर्जा निर्मितीचेर भर दिवप ही अभिमानाची गजाल आसा. हें धोरण येसस्वी तरेन चालीक लागले जाल्यार ताचो गोंयाक बरो फायदो जातलो.
वीज निर्मितींत लोकांनीय वांटो घेवचोः ढवळीकार
सध्याचे स्थितींत गोंयाक मे- जून म्हयन्यांत 750 मॅगा व्हेट विजेची गरज लागता. सध्या 600 मॅगा व्हेट विजेची गरज आसा. गोंयांत फक्त 50 मॅगा व्हेट वीज तयार जाता, जाल्यार उरिल्ली वीज ही दुसऱ्या राज्यांतल्यान घेवची पडटा. ताका लागून आतां गोंयांतूच वीज निर्मिती करतना सौरउर्जा प्रकल्पां खातीर गोंय सरकार भर दितलें. ह्या वावरांत लोकांनीय वांटो घेवपाक जाय, अशें मंत्री सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
