गोंयाक भारताची सांस्कृतीक राजधानी करपाचो यत्नः मुख्यमंत्री

भांगरभूंय | प्रतिनिधी

-स्वरमंगेश संगीत महोत्सवाचे कला अकादमीच्या मा. दीनानाथ कला मंदिरांत उक्तावण

पणजीः भारत संस्कृतीचें गिन्यान दिवपी देश. वेदा पसून आयुर्वेदा मेरेन सगल्या गिन्यानाचें भांडार भारतांत आसा. हे सांस्कृतीक दायज सांबाळपाची गरज आसा. गोंयाक भारताची सांस्कृतीक राजधानी करपाचो आमचो यत्न आसा, अशें मुख्यमंत्री डॉ. प्रमोद सावंत हांणी सांगलें.

स्वस्तीक आयोजीत आनी फाेमेंतो प्रस्तूत तपपूर्ती मा. दीनानाथ मंगेशकार यादस्तीक स्वरमंगेश संगीत महोत्सवाचे कला अकादमीच्या मा. दीनानाथ कला मंदिरांत उक्तावण केले उपरांत मुखेल सोयरे ह्या नात्यान मुख्यमंत्री डॉ. सावंत उलयताले.

माचयेर सन्माननीय सोयरे कला संस्कृती मंत्री गोविंद गावडे, एमआयटी स्कूल ऑफ लिबरल आर्टच्याे सहयोगी अधिष्ठाता डॉ. प्रीती जोशी, नामनेचे प्रवचनकार डॉ. संजय उपाध्ये, प्राचार्य अनिल सामंत, स्वस्तीकचे अध्यक्ष डॉ. प्रविण गांवकार, सचीव योगिता याजी, आश्रयदाते विनायकुमार मंत्रवादी राजदीप बिल्डर्सचे प्रतिनिधी रवींद्र राहाळकर हाजीर आशिल्ले. मुख्यमंत्री डॉ. प्रमोद सावंत हांचे हस्तुकीं ह्या वेळार स्वरमंगेश यादस्तीकेचे प्रकाशन जाले.

डॉ. उपाध्ये हांणी राजाची उपमा दिली तेन्ना मुख्यमंत्र्यांनी म्हणलें, हांव राजा न्हय, अंत्योदय तत्वाचेर सेवा करपी एक सेवक. नव्या पिळगेक भारतीय संस्कृती कडेन व्हरपाच्या स्वस्तिकाच्या यत्नांची तांणी तोखणाय केली. ह्या महोत्सवाक हातभार लावपाचे अभिवचन मुख्यमंत्र्यांनी दिले.

अभिजात संगीत आनी आत्मानंद

डॉ. संजय उपाध्ये हांणी अभिजात संगीत आनी आत्मानंद हे विशीं म्हायती दिली. तांणी म्हणलें, भारतीय संस्कृतीक संस्थापक ना. भारतीय अभिजात संगीत हे दोतोरांच्या वखदा सारकें आसा. हे संगीत समाधी कडेन व्हरपी आसा.

गोविंद गावडे हांणी सांगलें, संगिताच्या स्वरांतल्यान आमी जिणेचो सुखमय प्रवास करीत आयल्यात. सप्तसूर हे संस्कार करतात. डॉ. प्रीती जोशी हांणी एमआयटी स्कूल विशीं म्हायती दिली. संस्थेच्या विद्यापिठांत वीस हजार विद्यार्थी शिक्षण घेतात, आतां ’हॉलिस्टिक’ उदरगत करपाचें काम चालू आसा. प्रा. अनील सामंत हांणी येवकार दिलो. तांणी म्हणलें, स्वस्तीक, यत्न, प्रबोधन अानी प्रयोग करता. हे संमेलन नवी उर्जा दिता. गोविंद भगत, हेतल गंगानी हांणी सुत्रसंचालन केले. डॉ. प्रवीण गांवकार हांणी उपकार मानले.