भांगरभूंय | प्रतिनिधी
मंत्री रोहन खंवटेः ‘होमस्टे’ वरवीं पर्यटकांक आस्पावन घेतले
भांगरभूंय । प्रतिनिथी
म्हपशें: गोंयाक देशाची पर्यटन आनी सर्जनशील राजधानी करपाचे सरकार यत्न करता. होमस्टे उपक्रमाचे संकल्पने खाला गोंयांत पर्यटकांक आस्पावन घेतले. तशेंच हे पर्यटक थळावी जिणेशैली, संस्कृती, सैम हे सारक्यो गजाली समजून घेतले, अशी म्हायती पर्यटन मंत्री रोहन खंवटे हांणी दिली.
म्हापशेंच्या हनुमान नाट्यघरांत प्रधानमंत्री नरेंद्र मोदी हांच्या जिवीत प्रवासाचेर आदारीत, भारत मातेच्या भक्त पुत्राची काणी ह्या विशयाचेर दोन दिसांचें प्रदर्शन मांडलां. ताचें बिरेस्तारा मंत्री खंवटे हांचे हस्तुकीं उक्तावण जालें. ह्या वेळार ते उलयताले. तांचे वांगडा भाजपा प्रदेशाध्यक्ष सदानंद तानावडे, दयानंद सोपटे, उपनगराध्यक्ष चंद्रशेखर बेनकार, जिल्हो पंचायत वांगडी, सरपंच आनी हेर पदाधिकारी हाजीर आशिल्ले.
हालींच हिमाचल प्रदेशांतल्या धर्माशाळा वाठारांत तीन दिसांचें विवीध राज्यां आनी केंद्रशासीत प्रदेशांच्या पर्यटन मंत्र्यांची राष्ट्रीय परिशद जाली. हे परिशदेंत मंत्री खंवटे हांणी गोंयचें प्रतिनिधीत्व केल्लें. हे विशीं खंवटे उलयताले.
हे परिशदेंत ई- व्हिसाचो विशय चर्चेक आयलो. एकंदरीत पर्यटनाक इंटरनॅट सुविधा वरवीं चालना दिवपा संबंदांत गंभीरपणान चर्चा जाली. गोंयांत दर्जेदार पर्यटक जाय जाल्यार तांकां बऱ्यो सुविधा दिवप गरजेचें आसा. फुडारांत पर्यटन हो देशाच्या हेर विवीध राज्यांचे अर्थवेवस्थेंत म्हत्वाची भुमिका करतलें, अशें मंत्री खंवटे हांणी सांगलें. सरकार आनी मुख्यमंत्र्यां कडल्यान बेकायदो गजालींचेर खर कारवाय सुरू आसा. घुंवळे वखदां आनी शिंदळकी वेवसाय मुळा सकट ना करपा खातीर सरकार गंभीरपणान पावलां उखलता. एकाद्री गजाल घडली जाल्यार ताचो थेट संबंद पर्यटना कडेन जोडचो न्हय. हे खातीर प्रसार माध्यमांनी सकारात्मक गजाली दाखोवन गोंय हें पर्यटनाक सुरक्षीत अशें केंद्र आसा, हो संदेश पावोवपाची गरज आसा, अशें खंवटे हांणी सांगलें.
जेटी पॉलिसीचेर चर्चेक तयारः मंत्री खंवटे
जेटी पॉलिसी ही सुचोवण्या खातीर भौशीक केल्या. हरकती आनी आक्षेप आक्षेत जाल्यार त्यो लोकांनी त्यो मांडच्यो. गरजे भायर विरोधा खातीर विरोध करप चुकीचें आसा. सध्या हे पॉलिसी संबंदांत आपूण चर्चेक तयार आसा. पूण कांय जाण दुबाव निर्माण करतात. तें चुकीचें आसा. सगळ्या भागधारकांक विस्वासांत घेवन हे पॉलिसींतल्यो हरकती पयर करतले, अशें मंत्री रोहन खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
