भांगरभूंय | प्रतिनिधी
राज्यांत दर दिसा 1.65 लाख लिटर दुदाचें उत्पादन
भांगरभूंय । प्रतिनिधी
पणजीः सध्याचे स्थितींत गोंयाक दर दिसा चार लाख लिटर दुदाची गरज लागता. तातूंतलें 1.65 लाख लिटर दुदाचें गोंयांत उत्पादन जाता. उरिल्लें 2.35 लाख लिटर दूद हेर राज्यांतल्यान हाडचें पडटां, अशी म्हायती गोरवां सांबाळ खात्याचे मंत्री निळकंठ हळर्णकार हांणी विधानसभेंत लेखी प्रस्नाक दिल्ले जापेंत दिल्या.
विरोधी पक्ष फुडारी मायकल लोबो हांणी हे संबंदांत प्रस्न विचारिल्लो. गोंयांत दर दिसा कितल्या दुदाचें उत्पादन जाता? गोंयाक दर दिसा कितलें दूद लागता, अशे प्रस्न लोबो हांणी विचारिल्ले.
ह्या प्रस्नांक जाप दितना हळर्णकार हांणी म्हणलां, गोंयांतल्या शेतकारां कडल्यान दर दिसा 1.65 लाख लिटर दूद मेळटा. उरिल्लें दूर दुसऱ्या राज्यांतल्यान हाडटात.
एप्रील 2019 सावन आतां मेरेन कितलें लाख लिटर दीद हेर राज्यांतल्यान हाडलें, ताची म्हयन्यां प्रमाण पद्दतीन लोबो हांणी म्हायती मागिल्ली. ते प्रमाण मंत्री हळर्णकार हांणी ती सादरूय केली. मजगतीं, गोंयांत दुदाचें उत्पादन वाडोवचे खातीर राज्य सरकारा कडल्यान पुराय यत्न सुरू आसात. ते खातीर गोरवां सांबाळ खात्यान कामधेनू, पशुपालन, पाचवें तण लागवडी सयत दूद उत्पादकांक इन्सेंटिव्ह, सामुहीक डॅरी फार्मींग, गोरवां घेवपाक अनुदान, अनुसुचीत जाती- जमातींतल्या शेतकारांक गरजेचें साहित्य खरेदी करपाक अर्थीक मजत, गोठे बांदपा खातीर अनुदान, कृशी रिणाचेर अनुदान हे सारक्यो विवीध येवजण्यो सुरू केल्यात, अशेंय मंत्री हळर्णकार हांणी जापेंत म्हणलां.
चार वर्सांतली दुदाची आयात लिटरांत
2019-20- 20,88,406, 2020-21- 14,09,008, 2022-23- 3,41,275 (5 जुलय मेरेन)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
