भांगरभूंय | प्रतिनिधी
बायलांचे 17 वर्सां पिराये सकयले संवसारीक फुटबॉल सर्तीची येजमानकी हे खेपे भारताक मेळ्ळ्या. भुवनेश्वर, नवी मुंबय सयत गोंयांत फुटबॉल मॅची जातल्यो.
11 ऑक्टोबर पसून उपांत्यपूर्व आनी उपांत्य फेरी फातोड्डेंच्या पंडीत जवाहरलाल नेहरू स्टेडियमाचेर जातल्यो अशी म्हायती खेळां खात्याचे संचालक अजय गावडे हांणी दिली.
काल शेनवारा आयोजीत केल्ले पत्रकार परिशदेंत ते उलयताले. सर्तीचें उक्तावण ओडिशाची राजधानी भुवनेश्वरांत जातली. जाल्यार फायनल नवी मुंबय जातली. गोंयांत सर्तीचे सुवाते सयत बांबोळीच्या अॅथलेटीक मैदानाचेर, बाणावली फुटबॉल मैदानाचेर, मुरगांव वाडेच्या टिळक मैदानाचेर खेळगडयो सराव करतल्यो. स्पर्धकांची रावपाची वेवस्था जाल्या. संवसारीक सर्तीचे फाटभुंयेर गोंयांत 2 कार्नावाल आयोजीत केल्ले. चडांतचड भुरग्यां मेरेन पावपा खातीर विवीध उपक्रम लेगीत राबयल्यात अशें तांणी म्हणलें.
2017त दादल्यांची 17 वर्सां पिराये सकयली संवसारीक फुटबॉल सर्त आयोजीत केल्ली. ते उपरांत परतून गोंयाक ही संद फावो जाल्या. ह्या निमतान राज्यांत फिफा वतीन 8 हायब्रीड पीच तयार केल्या. ही एक खोशेची गजाल आसा. 8 देशांचे पंगड उपांत्यपूर्व फेरये खातीर राज्यांत येतले. ताका लागून राज्यांतल्या चडांतचड शालेय विद्यार्थ्यांनी हे संदीचो लाव घेवचो अशें तांणी मुखार म्हणलें.
नागरिकांक लेगीत मॅची पळोवपाक मेळच्यो म्हूण फिफान तिकीट विक्री सुरू केल्या, सर्ती खातीर सुमार तीन कोटी खर्च आयला अशें तांणी मुखार सांगलें.
पत्रकार परिशदे खातीर कोचिंगचे संचालक अर्जुन पुरस्कार जैतिवंत ब्रुनो कुतिन्हो आनी फिफाचे प्रकल्प संचालक अंकुश अरोरा उपस्थीत आशिल्ले. मजगतीं, गावडे हांणी गावडे हांणी मैदानांचो आनी हॉटेलांचो ताबो अरोरा हांचे कडेन दिलो.
विद्यार्थ्यां खातीर खाशेली प्रवासाची सुविधा
राज्यांतल्या विवीध शाळांतल्या विद्यार्थ्यांक मॅची पळोवपाक मैदानाचेर हाडटले. ते खातीर विशेश वाहनांची तजवीज केल्या. तशेंच मैदानाचेर तांचे खातीर कांय मनरिजवण उपक्रम लेगीत दवरल्यात. ताका लागून विद्यार्थ्यांनी शक्यतो शाळे वांगडा येवचे अशें गांवडेन सांगलें.
ह्या दिसा जातल्यो मॅची
10 ऑक्टोबराक श्यामाप्रसाद मुखर्जी इन्डोर स्टेडियमाचेर राज्य सरकारा वतीन सर्तीचो उक्तावण सुवाळो जातलो.
11,12,14,15,17,18 दिसा मॅची जातल्यो. 22वेर उपांत्यपूर्व आनी 26 तारखेक उपांत्य फेरी जातली. दरेक दिसा सांजेच्या 4.30 वरांचेर आनी रातच्या 8 वरांचेर मॅची जातल्यो.
उत्तर गोंयांतल्या विद्यार्थ्यांक सांजेच्या आनी दक्षीण गोंयांतल्या सरभोवतणच्या वाठारांतल्या विद्यार्थ्यांक रातच्या मॅचीं खातीर हाडटले. दरेक मॅचींत उण्यांतउणे 5-6 हजार विद्यार्थ्यी उपस्थीत रावतले अशी म्हायती अजय गावडेन दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
