भांगरभूंय | प्रतिनिधी
पणजीः गोंयांत सोमाराय व्हड प्रमाणांत पावस पडलो. राज्यांतल्या कांय वाठारांनी वादळी वाऱ्या सयत पडझडींच्या घडणुकांची नोंद जाल्या. राज्यांत 1 जून ते 22 जुलय ह्या काळांत सरासरी 102.99 इंच पावस पडला. अंदूं पावसाचें प्रमाण 56.8 टक्क्यांनी चड जाला. हवामान खात्यान 23 ते 24 जुलय ह्या काळांत राज्यांत व्हड प्रमाणांत पावस पडपाची शक्यताय उक्तायल्या ते खातीर ऑरेंज अलर्ट जारी केला.
राजधानी पणजे सोमारा दीसभर वत पावसाचो खेळ चालूच आशिल्लो. जायत्या दिसांनी सुर्याचो उजवाड निवळ जालो. पूण वेळोवेळांनी दडकांनी व्हड पावस पडटालो. पावसाक लागून जायत्या रस्त्यांचेर परतून उदक भरलें. राज्यांत चोवीस वरांत सरासरी 1.66 इंच पावस पडलो. मजगतीं केपें हांगा सगळ्यांत चड 2.36 इंच पावस पडला. जाल्यार मडगांवां 1.88 इंच पावसाची नोंद जाल्या.
राज्यांत 1 जून ते 22 जुलय ह्या काळांत सगळ्यांत चड 120.88 इंच पावस वाळपय पडला. हाचे उपरांत सांगें 115.72 इंच, सांखळे 111.91 इंच, फोंडें 107.79 इंच, काणकोण 106.27 इंच, पेडणें 105.33 इंच आनी केपें 102.85 इंच पावस पडला. सोमारा पणजे चडांत चड तापमान 29.4 अंश आनी उण्यांत उणें तापमान 24.8 अंश नोंद जालां. मुरगांवां चडांत चड तापमान 26.8 अंश आनी उण्यांत उणें 25 अंश आशिल्लें. फुडल्या पांच दिसांत चडांत चड तापमान 28 ते 30 अंश सेल्सियस मदीं आसपाची शक्यताय आसा, जाल्यार उण्यांत उणें तापमान 25 अंश सेल्सियस मदीं आसपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
