भांगरभूंय | प्रतिनिधी
बोलिव्हियन बायलेक अटक
घुंवळे वखदां वेव्हाराचें संवसारीक रॅकेट आशिल्ल्याचें उक्ताडार
दक्षीण गोंयांतल्यान नायजेरियन नागरिकाक अटक
पणजी : ब्राझीला सावन गोंयांत हाडपाचें आशिल्लें 15 कोटी रुपया मोलाचें 3 कील 20 ग्राम ब्लॅक कोकेन केंद्रीय नार्कोटीक कंट्रोल ब्युरोन (एनसीबी) मुंबय विमानतळार जप्त केलें. ह्या प्रकरणांत एनसीबीन बोलिव्हियाचे बायले सयत दक्षीण गोंयांतल्यान नायजेरियन नागरिकाक अटक केल्या. देशांत अशे तरेचीं घुंवळे वखदां पयलेच फावटी जप्त केल्यांत.
एनसीबीन दिल्ले म्हायती प्रमाण दक्षीण अमेरिके सावन एक प्रवासी बायल व्हड प्रमाणांत ड्रग्ज घेवन येवपाची आशिल्ल्याची म्हायती एनसीबीक गुप्तहेरांनी दिल्ली. ते प्रमाण एनसीबीचे अस्तंत क्षेत्रीय संचालक अमीत घावटे आनी अधिक्षक सुजीत कुमार सिंग हांच्या मार्गदर्शना खाला पंगडान मुंबय विमानतळार सांपळो रचून दरेक विदेशी नागरिकांची चवकशी सुरू केली.
ह्याच वेळार गुप्तहेरांनी दिल्ले म्हायती प्रमाण एक विदेशी बायल मुंबय विमानतळार 26वेर देंविल्ली. तशेंच ती बायल गोंयांत वचपा खातीर विमानांत चडपाचे तयारेंत आसतना एनसीबीन तिका चवकशे खातीर ताब्यांत घेतली. ती बायल बोलिव्हियाची आसून तिचें नांव नावा मरिना आसा, आनी तिची पिराय 35 वर्सांची आसा. उपरांत एनसीबीन भारतांत कित्या खातीर आयली आनी खंय वता ही चवकशी करून तिचेर प्रस्नांचो भडिमार केलो तेन्ना ती समाधानकारक जापो दिवंक शकली ना.
तिच्या सामानाची तपासणी केली तेन्ना तिचे बॅगेंत 15 कोटी रुपया मोलाचें 12 पाकिटां ब्लॅक कोकेन सांपडलें. ताचें वजन 3.20 किलोग्राम आशिल्लें. अदीक चवकशी केली तेन्ना हीं घुंवळे वखदां गोंयांतल्या एका नायजेरियन नागरिका कडेन दिवपाचीं आसात अशें तिणें सांगलें. थंयच्या पंगडान गोंय विभागाच्या अधिकाऱ्यांक वयली म्हायती दिली. ते प्रमाण दक्षीण गोंयांत एका हॉटेलाचेर धाड घालून पंगडान एका नायजेरियन नागरिकाक ताब्यांत घेवन चवकशी सुरू केल्या. तशेंच संबंदीत घुंवळे वखदां गोंया सयत शेजारच्या राज्यांनी तस्करी करपाचीं आसा अशी म्हायती मुखार आयली.
ह्या दोनूय दुबावितां कडल्यान मेळिल्ले म्हायती प्रमाण एनसीबीन गोंयांत धाडी घालपाचें सत्र सुरू केलां. बिरेस्तारा रातीं उसरां मेरेन उत्तर गोंयांत कारवाय सुरू आशिल्ली.
गोंयांत घुंवळे वखदांचो वेव्हार वाडत आसा. हालींच्या दिसांनी राज्याच्या विंगड विंगड वाठारांनी घुंवळे वखदां जप्त केल्यांत. घुंवळे वखदांच्या वेव्हाराचें संवसारीक रॅकेट आशिल्ल्याचो दुबाव हाचे पयलींच गोंय पुलिसांनी उक्तायिल्लो. ह्या दुबावाक घटाय दिवपी ही घडणूक आसा. घुंवळे वखदां विदेशांतल्यान गोंयांत येतात. गोंयांतल्यान तीं हेर राज्यांनी वतात. घुंवळे वखदां वेव्हाराचें गोंय हें केंद्र आशिल्ल्याचो दुबाव गोंय पुलिसांनी उक्तायिल्लो.
कोकेन काळ्या पदार्थां मदी घोळयले उपरांत तें ब्लॅक कोकेन जाता. हें कोकेन वळखुपाक कठीण जाता. ही मोहीम 3 दीस सुरू आशिल्ली.
सोनाली फोगट हिका घुंवळे वखदांच्या अती सेवनान मरण आयिल्लें. गोंयांत विदेशी पर्यटक घुंवळे वखदां खातीर येतात. हाका लागून राज्याचें पर्यटन बरेंच बदनाम जालां.
कळंगूट, बागा, मांद्रें, हरमल, कोलवा, बाणावली ह्या दर्यादेग वाठारांनी घुंवळे वखदांचो वावर वाडला. ते भायर गांवगिऱ्या वाठारांनी लेगीत आतां घुंवळे वखदांची विक्री जावपाक लागल्या.
ब्लॅक कोकेन म्हणल्यार कितें?
ब्लॅक कोकेन हें कोकेन अासता. हें कोकेन काळ्या पदार्थां मदीं घोळयले उपरांत ताचो रंग काळो जाता. घुंवळे वखदांचो वास घेवन सोदून काडपी सुण्यांक लेगीत तें वळखूंक येना.
सीबीआय, एनसीबी कडल्यान धाडी
देशाच्या तरेकवार वाठारांनी धाडी घालून सीबीआय तशेंच एनसीबीन घुंवळे वखदां प्रकरणांत 175 जाणांक अटक केल्या. घुंवळे वखदां आड एनसीबीची मोहीम सुरूच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
