भांगरभूंय | प्रतिनिधी
हैदराबाद : गोंयांत येवपाक ट्रेन धरतना एका २८ वर्सां पिरायेच्या नवोच लग्न जाल्ल्या तरणाट्याक अपघातांत मरण आयलें. वुरुगोंडा साई अशें ह्या मरण आयिल्ल्या तरणाट्याचें नांव. तो एके खाजगी कंपनींत कामांक आशिल्लो. मेळिल्ले म्हायती प्रमाण ताचें लग्न तीन म्हयन्यां (१२ मार्च) पयलींच जाल्लें. तो गोंयचे भोंवडे खातीर आपल्या इश्टां वांगडा येतालो.
५ जुना सकाळीं ९.३० वरांचेर साई, ताची घरकान्न आनी ताचे इश्ट प्लॅटफॉर्म नंबर ९ चेर आयले. ते वास्को-द-गामा एक्सप्रेसी खातीर राविल्ले. सुमार १०.३० वरांचेर, ट्रेन सुरू जाल्ली. साई ट्रेनींत चडपाचो यत्न करतना तो प्लॅटफॉर्म आनी ट्रेनीच्या मदीं पडलो. ताचे तकलेक आनी आंगांक बरोच मार बसलो. ताका बेगोबेग हॉस्पिटलांत व्हेलो. मात थंय ताका मरण आयलें.
रेल्वे पुलिसांचे म्हायती प्रमाण, साई ट्रेनींत चडून परत देंविल्लो. तीन फावटी चड-देंव केले उपरांत निमाणो तोल वचून तो सकयल पडलो, अशें कांय साक्षीदारांनी सांगलें. ही घडणूक पळोवन स्टेशनाचेर आशिल्ले प्रवाशी भियेले. नवोच लग्न जाल्ल्या साईक अशें मरण आयिल्ल्यान सगळ्याक दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
