भांगरभूंय | प्रतिनिधी
6 पदां खातीर सरकारी अधिकाऱ्यां कडल्यान मागयले अर्ज
भांगरभूंय I प्रतिनिधी
पणजी : फाटल्या नोव्हेंबरांत मंत्रीमंडळाची मान्यताय मेळिल्लो गोवा कर्मचारी भरती आयोग सक्रीय केला. आयोगाचेर परिक्षा नियंत्रका सयत 6 पदां डेप्युटेशनाचेर भरपाक इत्सूक सरकारी अधिकाऱ्यां कडल्यान 15 जानेवारी मेरेन अर्ज मागयल्यात. हाचे मुखार सरकारी खात्यांतलीं नोकरीची सगलीं पदां आयोगा वरवींच भरतले.
जुलयांत जाल्ल्या पावसाळी अधिवेशनांत रिव्हॉल्युशनरी गोवन्स पक्षाचे (आरजीपी) आमदार विरेश बोरकार हांणी विचारिल्ल्या लेखी प्रस्नांच्या जापेंतल्यान मुख्यमंत्री डॉ. प्रमोद सावंत हांणी सरकारी पदां भरपाक कर्मचारी आयोगाची स्थापणूक करतले, अशें नमूद केल्ले.
ते उपरांत फाटल्या नोव्हेंबरांत कामगार खात्यान ताळगांव पठारा वयल्या डॉ. श्यामाप्रसाद मुखर्जी इनडोअर स्टेडियमाचेर आयोजीत रोजगार मेळाव्याच्या उक्तावणा वेळार उलयतना ‘ना खाऊंगा, ना खाने दूंगा’चो नारो दिवन जानेवारीच्यान सरकारी नोकरीचीं पदां कर्मचारी भरती आयोगा वरवीं भरतले. हाचे मुखार मंत्री वा आमदार सरकारी नोकऱ्यो दिवचे नात. ते खातीर तांच्या घरा वचपाची गरज ना. गोंयांत हो चुकीचो पांयडो पडिल्लो, अशें स्पश्टपणान नमूद केल्ले.
ह्या पदां खातीर मागयले अर्ज
परिक्षा नियंत्रक – 1
लेखा उपसंचालक – 1
लेखापाल (अकावंटंट) – 1
मुख्य कारकून (हेड क्लार्क) – 1
युडीसी – 2
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
