भांगरभूंय | प्रतिनिधी
न्यायालयांत खटले प्रलंबीत उरपाचें प्रमाण मात चड
भांगरभूंय । प्रतिनिधी
पणजीः देशाचे तुळेंत अनुसुचीत जाती (एससी) आनी अनुसुचीत जमाती (एसटी) समाजांतल्या लोकां आड गुन्यांवांचें प्रमाण उणें आसा. अशें आसलें तरीय हे विशीचे खटले न्यायालयांत प्रलंबीत उरपाचें प्रमाण मात चड आसा. डिसेंबर 2022 अखेरेक गोंयांत एससी समाजा आड घडिल्ल्या गुन्यांवांचें प्रलंबीत उरपाचें प्रमाण 93.8 जाल्यार एसटी आडचे गुन्यांव प्रलंबीत उरपाचें प्रमाण 95.8 टक्के आसा.
गोंयांत एससी समाजांतल्या लोकां आड 2020त 2, 2021त 4 आनी 2022त 8 गुन्यांव दाखल जाले. 2022त गुन्यांव जावपाचें प्रमाण 31.4 टक्के जाल्यार चार्जशीट दाखल करपाचें प्रमाण 77.8 टक्के आशिल्लें. पुलिसांनी 2021 आनी 2022त गोंयांत वट्ट 10 प्रकरणांचो तपास केलो. तातूंतलीं 9 प्रकरणां निकालांत काडलीं, जाल्यार एक प्रलंबीत आशिल्लें. पुलिसा वतीन तपास प्रलंबीत उरपाचें प्रमाण 10 टक्के आशिल्लें.
न्यायालयांत 2021त 25 जाल्यार 2022त 7 अशे 32 खटले सुनावणेक आयिल्ले. तातूंतले 2 खटले निकालात काडले जाल्यार 30 खटले प्रलंबीत आशिल्ले. न्यायालयांत खटले प्रलंबीत उरपाचें प्रमाण 93.8 टक्के आशिल्लें. गोंयांत एसटी समाजांतल्या लोकां आड 2020त 2, 2021त 5 आनी 2022त 1 गुन्यांव दाखल जालो. 2022त चार्जशीट दाखल करपाचें प्रमाण 100 टक्के आशिल्लें. पुलिसांनी 2021 आनी 2022त गोंयांत वट्ट 2 प्रकरणांचो तपास केलो. तातूंतलें एक प्रकरण निकालांत काडलें जाल्यार एक प्रलंबीत आशिल्लें. 2022त न्यायालयांत खटले प्रलंबीत उरपाचें प्रमाण 95.8 टक्के आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
