भांगरभूंय | प्रतिनिधी
82 लाखांचो सोरो जप्त
पुणे, खबरां संस्था ः गोंयांतल्यान वखदां व्हरपी ट्रकांतल्यान सोऱ्याची तस्करी करपाची म्हायती मेळ्ळ्या उपरांत महाराष्ट्राच्या अबकारी खात्याच्या पंगडान पुणे लागसाराच्या खेड शिवपूर टोलनाको वाठारांत गोंयांतल्यान बेकायदेशीर रितीन सोरो व्हरपी ट्राकांक आडोवन ताची तपासणी केली. तेन्ना वखदांच्या बॉक्सांत 82 लाखांच्यो सोऱ्याच्यो बाटल्यो मेळ्ळ्यो. नव्या वर्साक येवकार दिवपा खातीर पुण्यांत आयोजीत केल्ल्या पार्ट्यांनी हो सोरो व्हरताले.
ह्या प्रकरणांत विपुल देवीलाल नट (32, देवीलालजी नट, रोहिनिया, बासवाडा, राजस्थान) हाका अटक करून सोऱ्या सयत ताचो ट्रकय जप्त केलां. गोंयांत सोरो सवाय आसा. हांगातलो सोरो व्हरोन हेर राज्यांनी विकपाचेर बंदी आसा. तरीय लेगीत बेकायदेशीर रितीन सोऱ्याची तस्करी करतात.
हो ट्रक मंगळारा सकाळीं सातारा सावन पुणेक वचपाचो आशिल्लो. टोल नाक्या लागसार ह्या पंगडान ट्रक थांबयलो तेन्ना ड्रायव्हरान वखदांची येरादारी सुरू आसा अशें सांगलें. उपरांत पंगडान ट्रकाची तपासणी सुरु केली. तेन्ना बॉक्सांत सोऱ्याच्यो बाटल्यो मेळ्ळ्यो. गोंयचो सोरो महाराष्ट्रांत विकपाक मेळना. ते खातीर महाराष्ट्र सोरो बंदी नेमा खाला ड्रायव्हरा आड गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
