गोंयच्या सायबा विशीं वादग्रस्त विधान

भांगरभूंय | प्रतिनिधी

सुभाष वेलिंगकार हांचेर कारवाय करपाची लोबाे हांची मागणी

पणजी : फ्रांसीस झेवियर ‘गोंयचो सायब’ जावपाकूच शकना, अशें विधान करपी गोंयांतल्या ​‘हिंदू रक्षा म्हाआघाडी’ हे संघटणेचे राज्य निमंत्रक सुभाष वेलिंगकार हांचेर काँग्रेस आनी भाजपांतल्या ख्रिस्ती आमदारांनी खर टिका केल्या. गोंयांतलो धर्मीक एकवट इबाडप्यांचेर बेगोबेग कारवाय करपाची मागणी विरोधी पक्षफुडारी मायकल लोबो हांणी मुख्यमंत्र्यां कडेन केल्या.

गोंय राज्य धर्मीक एकोपो, शांतताये खातीर देशभरांत वळखतात. गोंयकारांनी सदांच जाती-धर्माक कुशीक दवरून संघटीत रावप पसंत केलां. ‘गोयचो सायब’ म्हूण फामाद आशिल्ल्या संत फ्रांसीस झेवियर हांकां ख्रिस्ती समुदाया सयत हिंदू धर्मीय लेगीत मानतात. ताका लागुनूच दरवर्सा देश-विदेशांतले लाखांनी भावीक गोंयांत तांच्या दर्शना खातीर येतात. वेलिंगकार हांणी ह्या भाविकांक दुखयल्यात, तांचो अपमान केला. ते खातीर तांचेर कारवाय जावप गरजेचें, अशें मत मायकल लोबो हांणी उक्तायलां.
फ्रांसीस झेवियर हांकां ‘गोयचो सायब’ हें नांव ख्रिस्ती समुदायान दिलां. सगल्याच धर्माचे लोक तांकां मानतात, हेंच गोंयच्या एकोप्याचे प्रतीक आसा, अशें मंत्री निलेश काब्राल हांणी म्हणलें. वेलिंगकार हांचे सारके कांय जाण कितेंय विधानां करून प्रसिद्धी मेळोवपाचो यत्न करतात. तांचे तें वैयक्तीक मत. पत्रकारांनीय अशा व्यक्तींच्या विधानांक प्रसिद्धी दिवची न्हय, अशें मंत्री काब्राल हांणी सांगलें.
मजगतीं, सुभाष वेलिंगकार हांचेर सोशल मिडियांतल्यानूय टिका जाता. गोंयांत सगल्याच धर्माचे लोक एकोप्यान नंदतात. गोंयचे श्रद्धास्थान आशिल्ल्या संत फांसीस झेवियर हांचे विशीं चुकीचे उलोवन वेलिंगकार प्रसिद्धी मेळोवपाक पळयतात. गोंयांतली शांतताय इबाडपाक पळयतात, अशा व्यक्तींक गोंयांत थारो दिवचो न्हय, अश्यो जायत्यो प्रतिक्रिया सोशल मिडियार पातळल्यात.

कितें म्हणलें वेलिंगकार हांणी ?

भगवान परशुराम हाेच गोंयचो राखणकर्तो. फ्रांसीस झेवियर हो केन्नाच ‘गोंयचो सायब’ जावपाक शकना.
होली (गोवा) ‘इंक्विजिशन’ ही राक्षसी यंत्रणा गोंयांत हाडपाक फ्रांसीस झेवियर हेच जापसालदार आशिल्ले.
गोंयांत होली इंक्विजिशनान वट्ट 252 वर्सा केल्ल्या अत्याचाराची म्हायती नवे पिळगेक दिवप गरजेचें. ते खातीर 3 मे दिसा ‘गोवा फायल्स’ गोंयकारा मुखार दवरतले.