भांगरभूंय | प्रतिनिधी
-केंद्रीय कार्पोरेट मंत्रालयाच्या अहवालांतली म्हायती
पणजीः फाटल्या 8 वर्सांत गोंयांतल्या विवीध कंपनींनी ‘कंपनी सोशल रिस्पॉन्सिबिलिटी’ (सीएसआर) खाला 320 कोटी 41 लाख रुपया खर्च केल्यात. केंद्रीय कॉर्पोरेट मंत्रालयान हालींच ही म्हायती जारी केल्या. ह्या आठ वर्सांत 2017-18 त गोंयांतल्या कंपनींनी सगल्यांत चड 53 कोटी 77 लाख रुपयांचो सीएसआर निधी खर्च केल्लो.
मेळिल्ले म्हायती प्रमाण, गोंयांत 2018-19 त 46.77 कोटी, 2019-20 त 43.91 कोटी, 2021-22 त 42.59 कोटी, 2020-21 त 41.92 कोटी, 2026-17 त 36.25 कोटी, 2015-16 त 28.15 कोटी जाल्यार 2014-15 त 27.11 कोटी रुपया सीएसआर निधी खाला खर्च केल्यात.
राज्यांतल्या कंपनींनी 2016-17 वर्सां सगल्यांत चड 17.95 कोटी रुपया सीएसआर निधी शिक्षण, दिव्यांग व्यक्ती हांचे खातीर खर्च केले, जाल्यार भलायकी, गरिबी हटाव ह्या क्षेत्रांत सुमार 5 कोटी रुपया खर्च केले. 2017-18 त सगल्यांत चड 13.87 काेटी रुपया भलायकी क्षेत्रांत खर्च केले. 2018-19 त शिक्षण, दिव्यांग व्यक्ती खातीर 26.29 कोटी रुपया खर्च केले. 2019-20 आनी 2020-21 त कंपनींनी सीएसआर निधी खर्च करपा खातीर भलायकी मळाकूच प्राधान्य दिलां.
देशांत 2013 त कंपनी कायद्यांत दुरुस्ती करून तातूंत सीएसआर निधीची तजवीज केल्ली. ते प्रमाण कंपनीक ताच्या नफ्यांतले उण्यांत उणें 2 टक्के निधी सामाजीक कामां खातीर खर्च करचो पडटा. ते प्रमाण कंपनी विवीध सामाजीक मळार हो निधी खर्च करता. सप्टेंबर 2022 त ह्या कायद्यांत परतून बदल केलो. ते प्रमाण कंपनीक तांचो वापरूंक नाशिल्लो सीएसआर निधी एका बँक खात्यांत जमा करचो पडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
