भांगरभूंय | प्रतिनिधी
भुरगेपणा सावन इत्सा, आकांक्षा, सपनां बाळगुपी लोक आसतात, तांकां जर दिका, संद मेळ्ळी जाल्यार तांचो आत्मविस्वास आनीकय वाडपाक बळगें मेळटा. गोंयची तरणाटी सौ. नम्रता कामत हें हाची एक देख. नम्रताक भुरगेपणा सावन फॅशनीची आवड आशिल्ली. पूण घरांतले परिस्थितीक लागून ल्हान पिरायेचेर मार्ग मेळ्ळो ना. पूण बदलत्या काळांत तिणें युट्युबाच्या माध्यमांतल्यान आपलो छंद वाडयलो. ताचो अभ्यास केलो. सरकारी नोकरी सांबाळत कलेक वाव दिलो.
कांय दिसां आदीं धारवाडा (कर्नाटक) जाल्ले अखिल भारतीय ग्लोबल युनिटी क्वीन ऑफ इंडिया सर्तींत नम्रता अनयप्रसाद कामत (करासवाडो- म्हापशें) हांकां ग्लोबल युनिटी क्वीन ऑफ इंडिया 2022 चो किताब मेळ्ळा. देशभरांतल्यान वट्ट वीस बायलांनी हे सर्तींत वांटो घेतिल्लो. दोगूच गोंयचे आशिल्ले. तातूंत नम्रता हांकां किताब मेळ्ळो.
नम्रता ही हळदोणेंच्या सरकारी भलायकी केंद्रांत नर्स म्हणून काम करता. धारवाडच्या डॉ. वीरेंद्र कलाक्षेत्र सभाघरांत ही सर्त जाली. ल्हानपणा सावन फॅशन मळाचेर वचपाची आवड आशिल्ली. पूण घरचे परिस्थितीक लागून ह्या मळार शिकप घेवपाक मेळ्ळें ना. तरी लेगीत मोबायला वरवीं युट्युबाचेर फॅशनाची कला पळयतना बारकावे समजून घेतले. शिक्षण म्हत्वाचें. हे खातीर हांव अजूनय नर्सिंगाच्या मळार काम करूनय शिकतां. कारण शिक्षण हें एक यशस्वी जिणेचें सार. आजीवन शिकप हें ध्येय. कारण ताचे वरवींच मनीस संवसार जिखता. म्हजें प्राथमीक शिक्षण आंबेडे- नगरगांव शाळेंत जालें. हांव मूळ साखळेचें. लग्न जावन म्हापश्यां पावलें. पूत जाले उपरांत लेगीत पांच वर्सां उपरांत हांवें बेळगांवच्या नर्स म्हाविद्यालयांत फुडलें शिक्षण घेतलां. हाचे आदीं लेगीत 2020-21 वर्सा सालेली जाल्ल्या फॅशन शोंत म्हाका इनामां मेळ्ळ्यांत. सांखळेच्या रवींद्र भवनांत जाल्ले सर्तींतय यश मेळ्ळां.
धारवाड हांगा वेगवेगळीं स्पर्धात्मक सत्रां जालीं. तातूंत व्यक्तीमत्व विकास, बुद्धी, प्रस्नपत्रिका, वॉक राउंड हांचो आस्पाव आशिल्लो. अखिल भारतीय पांवड्यार जिखिल्ल्यान म्हाका थायलंड, मलेशिया आनी दुबय हांगा सर्तींत वांटेकार जावपाची व्हड संद मेळ्ळ्या अशें कामत हांणी सांगलें. शिर्की फॅशन क्रिएशन हे संस्थेन ही सर्त आयोजीत केल्ली. ताचे सीईओ श्रीकांत शेट्टेरे, शो. संचालक ओमकिरण, प्रकल्प मुखेली गिरीश अंगडी, कार्यकारी संचालक इस्थर मोहंका, विपणन प्रमुख वरुण काटी, प्रोडक्शन टीम सुनील, योगेश, भवानी आनी हेरांनी सर्तीचें काम पळयलें.
परिक्षक म्हूण मुहंम्मद नागम लतीफ (दुबई), रोझालीन डेव्हिड लांजोब (मलेशिया), फौजिया बसरी (मलेशिया), जुलेमा (स्पेन) आनी पेडली पीटर (मलेशिया) हांणी काम पळयलें, अशें कामत हांणी सांगलें. एकूणच नम्रता कामतीन गोंयाक व्हड नांव मेळोवन दिलां.
– पद्माकर केळकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
